Ўзбекистон, Тошкент - Batafsil.uz. Тошкент халқаро аэропорти божхоначилари бир нечта ҳолатда жами қиймати қарийб 2,3 миллиард сўмлик тилла буюмларни яширинча олиб ўтишга уринган шахсларни тўхтатиб қолди. Давлат божхона қўмитаси хабарига кўра, ҳуқуқбузарлар қимматбаҳо буюмларни кийимлари ва юклари ичига устамонлик билан яширишга ҳаракат қилишган.
Хусусан, қўшни давлатга учиб кетаётган фуқаронинг юки рентген текшурувидан ўтказилганда, жомадоннинг темир асосига ёпиштирилган 549 миллион сўмлик тилла ленталар топилган. Бошқа икки ҳолатда эса хориждан учиб келган шахсларнинг қинғир режаси фош этилган: улар ички кийимлари, шим чўнтаклари ва пайпоқлари ичига жами 1,5 килограммдан ортиқ заргарлик буюмларини яшириб, "яшил" йўлак орқали ўтмоқчи бўлишган.
Божхона ходимлари томонидан тўхтатиб қолинган ушбу қимматбаҳо буюмларнинг умумий оғирлиги 1,8 килограммдан ошади. Ҳозирда мазкур ҳолатлар юзасидан божхона органлари томонидан суриштирув ҳаракатлари давом эттирилмоқда.
Июль ойида ҳам Андижонлик фуқаро катта миқдордаги заргарлик буюмларини ноқонуний равишда мамлакатга олиб киришга уринган. "Водил авто" чегара-божхона постида ўтказилган тинтув чоғида унинг кийимлари остидан 859 дона заргарлик буюмлари ва қўл соати топилган бўлиб, у уларни яширинча чегарадан олиб ўтмоқчи бўлган.
Изоҳлар мавжуд емас