Ўзбекистон, Тошкент - Batafsil.uz. Самарқанднинг "Динамо" футбол клуби муқаддам вояга етмаган қизни зўрлагани учун судланган ганалик ярим ҳимоячи Кингсли Сарфо билан шартнома имзолади. 30 ёшли футболчи Дубайдаги йиғинга жамоа қароргоҳига етиб бориб, эркин агент мақомида бир йиллик шартнома имзолади.
Клуб матбуот хизматининг маълум қилишича, футболчи марказий ярим ҳимоячи позициясида ўйнайди. Сўнгги тўрт йил давомида легионер Кипрнинг АПОЭЛ клуби шарафини ҳимоя қилган, бунгача эса "Никосия," Швециянинг "Малмё" ва "Сириус" клубларида тўп сурган.
Ўшанда "Малмё" футболчиси бўлган 23 ёшли Сарфо 14 ёшли қизни зўрлашда айбдор деб топилган ва Швеция суди томонидан икки йил-у саккиз ойлик қамоқ жазосига ҳукм қилинган. Футболчининг ўзи суд жараёнида жабрланувчининг ёшини билмаганини таъкидлади. Бироқ суд унинг далилларини рад этди, жабрланувчи эса суд мажлисида спортчи уни жинсий алоқа қилишга мажбурлаганини айтди.
Жазони ўтаб бўлгач, у Кипр чемпионатидаги фаолиятини давом эттирди ва у ерда мамлакат кубоги ва суперкубогини қўлга киритди, бироқ 2024 йилдан бери уни жароҳатлар қийнамоқда.
Аввалроқ ҳужумчи Элдор Шомуродов Ўзбекистоннинг 2025 йилдаги энг яхши футболчиси деб топилганди. Ўзбекистон футбол ассоциацияси мавсум якунларини сарҳисоб қилиб, ҳар йили ўтказиладиган миллий мукофот совриндорларини эълон қилди. Йилнинг энг яхши футболчиси деб Диёра Ҳабибуллаева топилди. Энг яхши мураббий унвонига Тимур Кападзе сазовор бўлди.
Изоҳлар мавжуд емас