Ўзбекистон, Тошкент - Batafsil.uz. АҚШ Мудофаа вазирлиги Эрон билан давом этаётган қуролли тўқнашувга нуқта қўйиш мақсадида "Эпик ғалаба" деб номланган ҳарбий амалиётга тайёргарлик кўрмоқда. Axios нашрининг Оқ уйдаги манбаларига таяниб хабар беришича, яқин 48 соат ичида музокараларда силжиш бўлмаса, Пентагон Эроннинг стратегик муҳим Харк, Лорак ва Абу-Мусо оролларини оккупация қилишга киришади.
Янги стратегия нафақат ҳаво зарбаларини, балки Ҳўрмуз бўғози орқали Эрон нефти экспортини бутунлай тўсиб қўйишни ҳам кўзда тутади. Харк ороли Эрон нефть терминалининг асосий бўғини бўлгани сабабли, унинг назоратга олиниши Теҳронни асосий даромад манбаидан маҳрум этади.
Оқ уй матбуот котиби Кэролайн Ливитт президент Дональд Трамп тинчлик тарафдори эканини, бироқ Эрон мағлубиятни тан олмаса, унга нисбатан мисли кўрилмаган куч ишлатилишини таъкидлаган. Айни пайтда Туркия, Покистон ва Миср томонлар ўртасида воситачилик қилишга уринмоқда.
Эслатиб ўтамиз, февраль ойи охирида бошланган ҳарбий амалиётлар натижасида Эрон олий раҳнамоси ва юқори мартабали мулозимлар ҳалок бўлган эди. Агар дипломатик саъй-ҳаракатлар натижа бермаса, минтақада Яқин Шарқ тарихидаги энг йирик геосиёсий ўзгаришлар юз бериши ва янги ҳарбий харита чизилиши тахмин қилинмоқда.
Изоҳлар мавжуд емас