Ўзбекистон, Тошкент - Batafsil.uz. Қирғизистон Миллий хавфсизлик давлат қўмитаси раиси Қамчибек Ташиев Иссиқкўл вилоятидаги йўл қурилиши жараёнида Хитойнинг China Road компанияси вакилларига нисбатан кескин норозилик билдирди. У Хитой компаниясининг мамлакатда узоқ йиллардан бери йирик маблағларни "айлантираётгани" ва лойиҳаларни амалга ошираётганига қарамай, давлат тилига бўлган ҳурматсизлигини қаттиқ танқид қилди.
Ташиев Барскоон – Қоракўл трассасини қураётган компания ходимлари билан мулоқот қилар экан, улардан қирғиз тилида гапира олишларини сўраган. Ходим рус тилида жавоб беришини айтгач, МХДҚ раҳбари қуйидагича эътироз билдирган:
"Нега ҳалигача қирғиз тилини ўрганмадингиз? China Road Қирғизистонда неча йилдан бери ишлаяпти? 20 йил бўлди! Наҳотки қирғизча гапиришни билмасангиз? Ўрганинг!" — деган Ташиев.
Шунингдек, раҳбар нафақат хорижий компанияга, балки маҳаллий мутасаддиларга ҳам тил ва йўл билан боғлиқ қатъий топшириқлар берган.
У Хитой компаниясининг шартномадаги узоқ муддатларини ҳам "енгил қабул қилмаслигини" ва ишни тезлатишни талаб қилган.
Компания ишни 2028 йилда тугатишни режа қилган бўлса-да, Ташиев уларни 2027 йилгача якунлашиши кераклигини айтган.
Унинг фикрича, лойиҳаларнинг чўзилиши халқнинг қийналишига ва бюджет маблағларининг самарасиз сарфланишига олиб келади.
Эслатиб ўтамиз, Ўзбекистон миллий валютасини ёққан хитойликларга катта миқдорда жарима қўлланилганди.
Изоҳлар мавжуд емас