Ўзбекистон, Тошкент - Batafsil.uz. Россия Ташқи ишлар вазири Сергей Лавров 29 декабрга ўтар кечаси Украина дронлари Новгород вилоятидаги Валдай президент қароргоҳига ҳужум қилишга уринганини маълум қилди. Бу баёнот Киев ва Вашингтон ўртасида урушни тугатиш бўйича музокаралар фаоллашган бир пайтда янграган.
Лавровнинг сўзларига кўра, Украина учувчисиз учиш аппаратлари (БПЛА) президентнинг "Долгие Бороды" (Валдай) қароргоҳини нишонга олган. Ҳодиса оқибатида жароҳатланганлар ёки вайронагарчиликлар қайд этилмаган.
Аммо на Кремль, на Мудофаа вазирлиги ҳужум содир бўлганини тасдиқловчи бирорта видео ёки фотодалил тақдим этмаган.
Лавров ушбу ҳаракатни "давлат терроризми" деб атаб, Россия Қуролли кучлари жавоб зарбалари учун нишонлар ва вақтни аллақачон белгилаб қўйганини айтган. Шунингдек, у Россиянинг музокаралардаги позицияси қайта кўриб чиқилишини билдирган.
Украина Президенти Владимир Зеленский Москванинг айбловларини кескин рад этган ва уларни "фейк"деб атаган.
Зеленскийнинг фикрича, Россия бу тўқима ҳикоя орқали Украина шаҳарларига, хусусан Киевга қилинадиган янги зарбаларни оқламоқчи ва Трамп жамоаси билан эришилаётган тинчлик йўлидаги прогрессни йўққа чиқармоқчи.
"Россияликлар тинчликни хоҳламайди, улар фақат босим остида урушни тўхтатиши мумкин", — деган Украина раҳбари.
Ушбу ҳодиса Путин ва Трамп ўртасидаги 2025 йил ҳисобидан 10чи телефон сўзлашуви вақтида ҳам муҳокама қилинган.
Россия президенти Трампга ҳужум Украина ва АҚШнинг Мар-а-Лагодаги музокараларидан сўнг дарров содир бўлганини айтган.
Оқ уй вакиллари Трамп бу хабардан "ҳайратда қолганини" билдирган. Бироқ кейинроқ Трамп журналистларга берган интервьюсида ҳужум ҳақидаги хабарлар "ёлғон" бўлиши мумкинлигини истисно қилмаслигини, лекин бу ҳақда унга Путиннинг ўзи сўзлаб берганини айтган.
Аввалроқ Новгород вилояти губернатори аввалроқ минтақага жами 41 та дрон ҳужум қилгани ва улар Ҳаво ҳужумидан мудофаа тизимлари томонидан уриб туширилганини маълум қилган. Бироқ у пайтда президент қароргоҳи ҳақида ҳеч қандай маълумот берилмаган.
Эслатиб ўтамиз, ўтган куни, 28 декабрь куни, Флоридада ўтган тарихий музокаралар ва Путин ҳамда Трамп ўртасидаги 75 дақиқалик "илиқ" мулоқот натижасида Украинадаги урушни тўхтатиш бўйича келишув лойиҳаси деярли якунига етганди. Томонлар вақтинчалик сулҳ эмас, балки можарога узил-кесил нуқта қўйиш зарурлигини тан олгандтлар.
Изоҳлар мавжуд емас