Ўзбекистон, Тошкент - Batafsil.uz. Кеча, 12 ноябрь куни, кечқурун АҚШ Конгрессининг Қуйи палатаси вақтинчалик бюджетни маъқуллаган, шундан сўнг Президент Дональд Трамп ҳам ҳужжатни имзолаб, ҳукумат фаолиятини қайта тиклади.
Эслатиб ўтамиз, АҚШда 1 октябрдан бошлаб федерал муассасаларнинг бир қисми ишламай қолганди, бунга конгресс янги молиявий йил учун бюджетни келишиб олишга улгурмагани сабаб бўлган. Ҳукумат охирги марта 2018 йил охирида, айнан Трампнинг биринчи муддати даврида ўз ишини тўхтатганди. Бу билан мамлакат тарихидаги энг узоқ — 43 кун давом этган шатдаун ўз ниҳоясига етди.
Қонун лойиҳаси 222 конгрессмен овози билан қабул қилинган. Республикачилар 216, демократлар эса 6 овоз билан ҳужжатни қўллаб-қувватлаган. Икки нафар республикачилар эса демократлар билан биргаликда қарши овоз берган. Сенат бу бюджетни олдинроқ маъқуллаган эди.
Президент имзолаган вақтинчалик бюджет федерал ҳукумат агентликлари ва вазирликларига 2026 йил 30 январгача маблағ ажратишни кафолатлайди. Бу билан иш ҳақисиз ишлаган ёки мажбурий таътилга чиқарилган давлат хизматчилари ишга қайтишади.
Бюджет лойиҳаси айни пайтда шатдаун туфайли тўхтаб қолган дастурлар, жумладан кам таъминланган аҳоли учун мўлжалланган SNAP озиқ-овқат дастурини ҳам молиялаштиришни назарда тутади. Ушбу дастурлар 2026 йил сентябр охиригача молиявий кафолатга эга бўлади.
Шундай бўлса-да, вақтинчалик бюджет фақат икки ойга етарли. Шу сабаб Конгресс январь охирига қадар яна янги молия келишувига эришиши керак бўлади.
Бюджет бўйича келишмовчилик асосан соғлиқни сақлаш субсидиялари масаласига бориб тақалган. Демократлар 24 миллион америкалик учун тиббий суғуртага берилган солиқ имтиёзларини узайтиришни талаб қилган, аммо республикачилар бу таклифни рад этган. Улар декабрь ойида бу масала бўйича алоҳида овоз беришни таклиф қилишган.
Изоҳлар мавжуд емас