Ўзбекистон, Тошкент - Batafsil.uz. Ўзбекистон элчихонаси дипломатлари Покистонда одам савдоси қурбонига айланган ўзбекистонлик аёлни жинсий қулликдан қутқариб қолишди. Фоҳишахонада аёл етти йил умрини кечирган.
Аёлнинг ўзи мамлакатимизнинг Исломободдаги элчихонасига ёрдам сўраб мурожаат қилган. Бу ҳақда деб "Dunyo" хабар бермоқда. У дипломатларга 2018 йилда аёллар салонида ишлаш баҳонасида алдов йўли билан Покистоннинг Лаҳор шаҳрига олиб кетилганини айтган. Бироқ номаълум шахслар уни фоҳишахонага сотиб юборишган.
Элчихона ходимлари томонидан фуқарога зарур ҳужжатлар, жумладан, ватанга қайтиш гувоҳномаси тезкорлик билан расмийлаштириб берилган. Покистон ҳукумати билан музокаралардан сўнг аёл мамлакатда бўлиш қоидаларини бузганлик учун жавобгарликдан озод қилинди. Унга жарималар ва тўловларсиз мамлакатни тарк этишга рухсат берилган.
Элчихона ва Миграция агентлиги кўмагида ватандошимизга авиачипта олиб берилган ва у ватанга қайтган.
Эслатиб ўтамиз, 30 июлдан 30 августгача Ўзбекистонда "Ватанга қайтиш" хайрия акцияси бўлиб ўтди. Бу даврда хорижда қийин аҳволга тушиб қолган ёки депортация марказларида бўлган 1 минг 200 дан ортиқ ватандошимиз юртимизга қайтиб келди.
Аввалроқ, ҳуқуқ-тартибот идоралари ходимлари Тошкент аэропортида ватандошини Туркияга олиб кетмоқчи бўлган ёш ўзбекистонлик аёлни қўлга олган эди. Маълум бўлишича, аёл жинсий қул бўлиши мумкин эди.
Изоҳлар мавжуд емас