Ўзбекистон, Тошкент - Batafsil.uz. Олий Мажлис Сенати Самарқанд вилоятининг Каттақўрғон шаҳри ҳамда Каттақўрғон ва Нуробод туманлари чегараларини қайта тақсимлаш тўғрисидаги қарорни маъқуллади.
Эслатиб ўтамизки, ҳужжат Каттақўрғон туманидан 1,9 минг гектардан ортиқ ва Нуробод туманидан 970 гектардан ортиқ ерни шаҳарга ўтказишни назарда тутади. Шу билан бирга, Нуробод туманидан 600 гектар ер Каттақўрғон тумани таркибига берилади.
Ўзгаришлардан мақсад - Каттақўрғонни ўрта шаҳарлар тоифасидан чиқариб, йирик шаҳарлар тоифасига ўтказиш. 2030 йилга бориб аҳоли сони 150 мингдан ошиши кутилмоқда. Кенгайиш янги мактаблар, болалар боғчалари, шифохоналар, муҳандислик тармоқлари ва кўп қаватли турар-жой мажмуаларини қуриш учун шароит яратади.
Иқтисодиётда 50 гектар майдонда "Ургут" эркин иқтисодий зонасининг филиали ҳамда 30 гектар майдонда 3 та кичик саноат зонаси ташкил этилиши режалаштирилган. Саноат корхоналари сони 330 тадан 500 тага, ишлаб чиқариладиган маҳсулотлар ҳажми эса қарийб 2 баробарга оширилиши керак. 2030 йилга қадар хизматлар соҳасида корхоналар сонини 3 мингтага етказиш режалаштирилган.
Каттақўрғонни ривожлантиришга 70 миллион доллар инвестиция йўналтирилади. Вилоятнинг экспорт салоҳияти 65 миллион долларга етказилади, қишлоқ хўжалигида қўшилган қиймат занжирини ривожлантиришга алоҳида эътибор қаратилади.
Лойиҳа аввалроқ Вазирлар Маҳкамаси томонидан таклиф этилган ва Қонунчилик палатаси ҳамда маҳаллий кенгашлар даражасида қўллаб-қувватланган эди.
Изоҳлар мавжуд емас