Ўзбекистон, Тошкент - Batafsil.uz. Ижтимоий тармоқларда Тошкентнинг Мирзо Улуғбек туманида жойлашган машҳур раққоса Тамарахоним уй-музейининг "бузилаётгани" акс этган суратлар тарқалди. Ҳолат юзасидан туман ҳокимлиги матбуот хизмати котиби Batafsil.uz мухбирига ахборот тақдим қилди.
Матбуот котиби Маъмур Пармонов маълум қилишича, айни пайтда музей биносида қурилиш ва реконструкция жараёнлари кетмоқда. Бинонинг ташқи ва ички қисми Тамарахонимнинг юбилей тантаналарига тайёргарлик кўриш мақсадида тартибга келтирилмоқда. Бу ишлар Маданий мерос агентлиги илмий-эксперт Кенгашининг сайёр йиғилишининг 17-сонли баённомасига асосан амалга оширилмоқда.
Манзилдаги барча тарихий аҳамиятга эга экспонатлар, жумладан, санъаткорнинг ноёб саҳна либослари ва шахсий буюмлари хавфсизликни таъминлаш учун вақтинчалик бошқа жойга кўчирилган.
Таъкидланишича, музей асло бузилмайди ва йўқотилмайди. Аксинча, бу йил санъаткор таваллудининг 120-йиллиги муносабати билан бино ва унга туташ ҳудуд, жумладан, кўл атрофи тубдан янгиланиб, замонавий кўринишга келтирилади.
Масъул асосий мақсад — санъаткорнинг меросини келгуси авлодларга муносиб, янгиланган ва кўркам ҳолатда етказиш эканлигини билдирган. Март ойида ўтказиладиган юбилей тадбирларида музей ўз эшикларини меҳмонлар учун янада гўзал қиёфада очиши маълум қилган.
Изоҳлар мавжуд емас