Ўзбекистон, Тошкент - Batafsil.uz. Камбағалликни қисқартириш ва бандлик вазирлиги 2026 йилнинг март ойи учун ишлаб чиқариш календарини эълон қилди. Унга кўра, байрамларнинг дам олиш кунларига тўғри келиши ҳисобига фуқаролар бир неча бор кетма-кет дам олиш имкониятига эга бўладилар.
Халқаро хотин-қизлар байрами муносабати билан 8 март якшанба кунига тўғри келгани сабабли, Меҳнат кодексига асосан дам олиш куни 9 март, душанбага кўчирилади. Натижада, ҳафтасига 5 кун ишлайдиганлар 7, 8 ва 9 март кунлари (3 кун), 6 кунлик иш ҳафтасидагилар эса 8 ва 9 март кунлари дам олишади.
Шунингдек, Наврўз ва Рамазон ҳайити байрамлари бўйича қуйидаги тартиб белгиланди:
21 март (шанба) – Наврўз байрами ва дастлабки ҳисоб-китобларга кўра, Рамазон ҳайитининг биринчи куни;
23 март (душанба) – Шанба кунги дам олиш кунининг кўчирилиши ҳисобига дам олиш куни.
Бунда 5 кунлик иш ҳафтасидаги ходимлар 21, 22 ва 23 март кунлари (3 кун) кетма-кет ҳордиқ чиқаришади.
2026 йилги баҳор фасли ўзгача тарихий ва маънавий мазмунга эга бўлмоқда. Жорий йилда миллий қадриятларимиз тимсоли бўлган Наврўз байрами ва муқаддас Рамазон ҳайити бир кунга, яъни 21 март санасига тўғри келмоқда. Бу икки улуғ байрамнинг уйғунлашуви халқимиз учун ҳам маънавий, ҳам жисмоний тикланиш палласи бўлиб, белгиланган дам олиш кунлари оилавий ришталарни мустаҳкамлаш ва байрамларни юқори кайфиятда ўтказиш учун замин яратади.
Изоҳлар мавжуд емас