Ўзбекистон, Тошкент - Batafsil.uz. Ўзбекистонда Ҳиндистоннинг бутун ҳудудидан тирик ҳайвонлар ва паррандаларни, шунингдек, Ғарбий Бенгалия штатидан барча турдаги чорвачилик маҳсулотларини олиб киришга вақтинчалик тақиқ жорий этилди. Ушбу ҳудудда хавфли Нипах (NiV) вируси тарқалиши муносабати билан республика Бош давлат ветеринария инспектори томонидан қарор қабул қилинди.
Чекловлар 29 январдан кучга кирган.
Ҳимоя чораларини жорий этиш учун Бутунжаҳон ҳайвонлар соғлиғини сақлаш ташкилоти (WOAH) маълумотлари ва Ҳиндистондаги мураккаб эпидемиологик вазият тўғрисидаги хабарлар асос бўлди. Ҳужжатга кўра, Ғарбий Бенгалия штатидан ветеринария хизмати назорати остидаги товарларни олиб кириш тўлиқ тақиқланган, халқаро транзит бундан мустасно.
Вилоятлардаги ва чегара пунктларидаги ҳудудий инспекторларга чекловлар ижроси устидан қатъий назорат ўрнатиш, тадбиркорлар ўртасида тушунтириш ишларини олиб бориш топширилди. Шу билан бирга, ветеринария хизмати Ҳиндистоннинг эпизоотик жиҳатдан хавфсиз ҳудудларидан маҳсулотларни олиб киришни якка тартибда кўриб чиқиш ҳуқуқини ўзида сақлаб қолади.
Нипах вируси зооноз инфекция бўлиб, ҳайвонлар ва одамларда оғир касалликларни келтириб чиқаради. Вақтинчалик чеклов тўғрисидаги қарор ушбу патогеннинг Ўзбекистон ҳудудига кириб келиши ва тарқалишининг олдини олишга қаратилган.
Эслатиб ўтамизки, Жаҳон соғлиқни сақлаш ташкилоти инфекция етарлича ўрганилмагани сабабли Nipax вирусининг янада тарқалишини истисно қилмаяпти. Ташкилот ҳукуматни аҳолини хавф омиллари ҳақида хабардор қилишни кучайтиришга чақирди.
Изоҳлар мавжуд емас