Бир вақтнинг ўзида Ўзбекистоннинг икки вилоятида ноқонуний валюта сотган шахслар қўлга олинди

Ўзбекистон, Тошкент - Batafsil.uz. Бухоро ва Сирдарё вилоятларида чет эл валютасини ноқонуний айирбошлаш билан шуғулланган фуқаролар ушланди.

Бош прокуратура ҳузуридаги Департаментнинг маълум қилишича, тезкор тадбирлар ички ишлар органлари билан ҳамкорликда ўтказилган.

Хусусан, Бухоро вилоятининг Ромитан туманида икки нафар эркак 56,2 миллион сўмга 4,5 минг доллар сотиб олаётганда қўлга олинган.

Сирдарё вилоятида яна бир фуқаро 49 млн сўмга 4 минг доллар олган ва у ҳам ашёвий далиллар билан ушланган.

Мазкур ҳолатлар юзасидан Жиноят кодексининг 177-моддаси ("Валюта қимматликларини қонунга хилоф равишда олиш ёки ўтказиш") билан жиноят ишлари қўзғатилиб, тергов ҳаракатлари ўтказилмоқда.

Тергов ҳаракатлари давом этмоқда.