Ўзбекистон, Тошкент - Batafsil.uz. Жиноят ишлари бўйича Мирзо Улуғбек туман суди The Tower Hotel меҳмонхонаси яқинида шов-шувли муштлашувда иштирок этган 29 ёшли Акмал Шукуровга 8 йил-у 1 ой муддатга озодликдан маҳрум қилиш жазоси тайинлади. У қасддан баданга оғир шикаст етказиш, фирибгарлик ва безориликда айбдор деб топилди.
Эслатиб ўтамиз, ҳодиса 16 мартга ўтар кечаси Яккасарой туманидаги меҳмонхона яқинида содир бўлган. Тергов маълумотларига кўра, жабрланувчи Борис Авакян ўз танишини тажовузкор эркакдан ҳимоя қилишга уринган. Бунга жавобан Шукуров унинг бошига бир неча марта мушт туширган. Жабрланувчи оғир бош мия жароҳати олган, бош суяклари синган ва кома ҳолатига тушган.
Шукуров воқеадан сўнг хорижда яширинишга уринган, бироқ Қозоғистонда қўлга олинган.
Борис Авакянга ҳужум қилганликда айбланаётган Акмал Шукуров иши дастлаб айтилганидан кўра кенгроқ бўлиб чиқди. Агар дастлаб фақат безорилик ва оғир тан жароҳати етказиш ҳақида гап кетган бўлса, кейинчалик ахборот технологияларидан фойдаланган ҳолда жуда катта миқдордаги фирибгарлик айблови қўшилди.
Шукуровга нисбатан Жиноят кодексининг учта моддаси бўйича айблов эълон қилинди:
104-моддаси 2-қисми "е" банди (қасддан баданга оғир шикаст етказиш),
168-моддаси 3-қисми "а" ва "г" бандлари, 4-қисми "а" банди (фирибгарлик),
277-моддаси (безорилик) 3-қисми "г" банди.
Мирзо-Улуғбек туман судида эшитишлар ўтказилди. 4 сентябрда судья ҳимоя томонининг процессни ёпиш тўғрисидаги сўровини қаноатлантирди ва бу қарорни айбланувчининг шахсий ва оилавий ҳаётини ҳамда яқинларининг хавфсизлигини ҳимоя қилиш зарурияти билан асослаб берди.
Бугун, 24 октябрь куни суд судланувчига тақдим этилган ҳар учала модда бўйича ҳукмни ўқиб эшиттирди. Шукуров жазони умумий тартибли колонияда ўтайди.
Изоҳлар мавжуд емас