Ўзбекистон, Тошкент - Batafsil.uz. Тошкент шаҳар ҳокимлиги Хитойлик ҳамкорлар билан умумий қиймати 3,5 миллиард доллардан ортиқ бўлган инвестиция ва экспорт шартномалари пакетини имзолади. Мазкур ҳужжатлар йўл-транспорт қурилиши, уй-жой барпо этиш, саноат ишлаб чиқаришини ривожлантириш ва шаҳар инфратузилмасини модернизация қилиш соҳаларида аниқ лойиҳаларни амалга оширишни назарда тутади.
Келишувларга Сиань шаҳрида бўлиб ўтган Ўзбекистон-Хитой ҳудудлараро форуми доирасида эришилди. Портфелнинг асосий қисмини 3,3 миллиард доллардан зиёд инвестициялар ташкил этган бўлса, яна қарийб 156 миллион доллари экспорт шартномалари ҳиссасига тўғри келди.
Шаҳар инфратузилмаси ва уй-жой қурилиши
Энг муҳим йўналишлар қаторидан транспорт тизимини ривожлантириш, уй-жой қурилиши, муҳандислик тармоқларини модернизация қилиш ва шаҳарни ободонлаштириш жой олган. Хусусан, қуйидаги лойиҳалар муҳокама қилинмоқда
- Транспорт — BRT (тезкор автобус транспорти) тизимини ривожлантириш, йўл ўтказгичлар қуриш ва йўл инфратузилмасини яхшилаш
- Уй-жой — Реновация дастури доирасида замонавий турар жой мажмуаларини барпо этиш
- Шаҳар муҳити — "24/7 кўчалар" форматини ишга тушириш, парковка ечимларини ривожлантириш ҳамда дренаж ва ёмғир сувларини оқизиш тизимларини яхшилаш
Саноат ва янги ишлаб чиқариш
Саноат соҳасида ҳам бир қатор ташаббуслар кўриб чиқилмоқда. Жумладан, қурилиш материаллари, керамика ва чиқиндиларни саралаш ускуналари ишлаб чиқаришни йўлга қўйиш режалаштирилган.
Шунингдек, "Янги Авлод" саноат зонасини ривожлантириш бўйича ҳам келишувларга эришилди. Бу ерда хитойлик компаниялар билан ҳамкорликда технологик ечимларни жорий этиш ва янги ишлаб чиқариш қувватларини ишга тушириш кўзда тутилган.
Молиялаштириш қандай амалга оширилади?
Лойиҳаларни молиялаштириш давлат бюджети маблағларини тўғридан-тўғри жалб этмаган ҳолда, EPC+F модели асосида, яъни қурилишдан бошлаб тўлиқ фойдаланишга топширилгунча жалб қилинган маблағлар ҳисобига амалга оширилиши кўзда тутилган. Инвестицияларни қайтариш эса шаҳар иқтисодиётининг янги даромадлари ҳисобидан босқичма-босқич таъминланади.
Экспорт салоҳияти — Бундан ташқари, заргарлик маҳсулотлари, пахта йигирилган калаваси ва кумуш концентратини етказиб беришни назарда тутувчи экспорт шартномалари ҳам имзоланди.
Кутилишича, ушбу лойиҳалар пойтахтда янги иш ўринлари яратиш, шаҳар инфратузилмасини янгилашни тезлаштириш, Тошкентни янада қулай ва хавфсиз қилиш ҳамда замонавий технологик ва экологик ечимларни жорий этишга хизмат қилади.
Изоҳлар мавжуд емас