Ўзбекистон, Тошкент - Batafsil.uz. Олтинкўл туманида истиқомат қилувчи фуқаро фарзандларининг келгусидаги моддий таъминоти учун алимент пуллари ўрнига тўлиқ жиҳозланган икки хонали хонадонни расмийлаштириб берди.
Фуқаролик ишлари бўйича Андижон туманлараро судининг 2025 йил 11 декабрдаги қарорига асосан, қарздор зиммасига собиқ турмуш ўртоғи фойдасига уч нафар вояга етмаган фарзанди учун алимент тўлаш мажбурияти юкланган эди. Бироқ тарафлар ўзаро келишувга эришиб, пул маблағларини босқичма-босқич тўлашдан кўра, фарзандларни уй-жой билан таъминлаш афзал деб топилган.
Натижада қарздор ота Олтинкўл тумани, "Иттифоқ" маҳалласида жойлашган кўп қаватли уйлардан биридаги икки хонали хонадонни барча жиҳозлари билан бирга собиқ турмуш ўртоғи ва фарзандлари номига ўтказиб берган.
Мазкур турар жойнинг топширилиши ва тегишли тартибда расмийлаштирилиши ортидан ундирувчининг аризасига биноан ижро ҳужжати Мажбурий ижро бюроси томонидан белгиланган тартибда тамомланган.
Бундан олдин ҳам Чирчиқ шаҳар бўлими томонидан кўрилган чоралар натижасида, қарздор ота бир нафар фарзандининг 2036 йилгача бўлган таъминоти учун алимент эвазига ўз хонадонини ҳадя қилганди.
Изоҳлар мавжуд емас