Ўзбекистон, Тошкент - Batafsil.uz. Жорий йилнинг ноябрь ойидан бошлаб республикада Heritage Hotels of Uzbekistan дастури ишга туширилади - тадбиркорлар маданий мерос объектларини узоқ муддатли ижарага олишлари мумкин бўлади. Улар биноларни таъмирлаб, бутик-отеллар ташкил этади.
Объектларни давлат-хусусий шериклик шартлари асосида топшириш кўзда тутилган. Реставрация ишлари давлат ва хусусий маблағлар ҳисобидан амалга оширилади. Бу ҳақда президентнинг тегишли фармонида сўз боради.
Қайд этилишича, давлат бутик-меҳмонхоналарни тарғиб қилишда ёрдам беради ва дастур иштирокчилари учун бир қатор имтиёзлар яратади. Хусусан, уларга даромад солиғи, ер ва мол-мулк солиқлари ҳамда божхона тўловлари бўйича преференциялар берилади.
Ҳужжатга кўра, айрим объектларда тунги вақтда ишлаш йўлга қўйилади - у ерда кўнгилочар ва хизмат кўрсатиш муассасалари бўлган 24 соатлик янги туристик кўчалар ташкил этилади. Бунинг учун Вазирлар Маҳкамаси "тунги" иқтисодиётни ривожлантириш учун ҳудудларни ривожлантириш лойиҳасини тайёрлайди.
Шунингдек, Фарғонанинг Чимён, Сурхондарёнинг Омонхон ва Самарқанднинг Нурбулоқ масканларида 300−500 гектар майдонда йил давомида фаолият юритадиган дам олиш масканлари ташкил этилади. Бу лойиҳаларга 150 миллион доллар инвестиция киритилади.
Аввалроқ "Янги Ўзбекистон" боғи ёнида қурилган йирик меҳмонхона мажмуаси халқаро брендлар бошқарувига ўтказилиши ҳақида хабар берилганди. Leo Hospitality Solutions, Radisson Individuals ва Trademark Collection by Wyndham томонидан 12 та меҳмонхона назоратга олинади.
Изоҳлар мавжуд емас