Ўзбекистон, Тошкент - Batafsil.uz. Бухоро давлат тиббиёт институтида таҳсил олган 22 ёшли ҳиндистонлик талаба қизнинг фожиали ўлими юзасидан олиб борилаётган суриштирув ишларида янги тафсилотлар пайдо бўлди. Қотилликда марҳуманинг курсдоши — у билан бирга ўқиган Ҳиндистон фуқароси бўлган йигит гумон қилинмоқда.
Маълум бўлишича, талабалар ўртасида келиб чиққан ўзаро келишмовчилик оқибатида йигит қизга ноутбук билан ўта оғир ва ҳалокатли зарба берган. Ҳозирги вақтда гумонланувчи Ўзбекистон ҳуқуқ-тартибот идоралари томонидан қўлга олинган ва ҳибсда сақланмоқда.
Марҳуманинг жасади ватанига олиб борилганидан сўнг, Ҳиндистоннинг Керала штатида такрорий суд-тиббий экспертизаси ўтказилди. Қизнинг яқин қариндошлари унинг танасида кўплаб жароҳат излари аниқланганини маълум қилиб, ҳолат юзасидан янада чуқурроқ ва синчковлик билан тергов ҳаракатлари олиб борилишини талаб қилишмоқда.
Бундан ташқари, оила аъзоларининг иддао қилишича, қиз ўлимидан олдин маълум даражада босимларга, жумладан, диний масалалар билан боғлиқ таъқибларга учраган бўлиши мумкин. Бироқ ушбу диний босим ҳақидаги маълумотлар ҳозирча расмий идоралар томонидан тасдиқланмаган.
Ҳиндистон миллий қонунчилиги мамлакат фуқароларига нисбатан хорижда содир этилган жиноятларни ўз ҳудудидан ташқарида ҳам тергов қилишга имкон беради. Агар айбланувчи Ўзбекистонда тегишли жиноий жавобгарликка тортилса, Ҳиндистондаги тергов ҳаракатлари тўхтатилиши мумкин. Шундай бўлса-да, Ҳиндистон томони вазиятни диққат билан кузатиб бормоқда ва ўз миллий қонунчилиги доирасида алоҳида мустақил тергов бошлаш эҳтимолини ҳам инкор этмаяпти. Айни пайтда мазкур мудҳиш воқеа юзасидан тергов ҳаракатлари давом этмоқда.
Изоҳлар мавжуд емас