Ўзбекистон, Тошкент - Batafsil.uz. Тошкентнинг Олмазор туманидаги хусусий клиникада бурун операцияси вақтида 31 ёшли эркак вафот этди. Ҳолат юзасидан Олмазор тумани прокуратураси томонидан тергов ишлари бошланган.
Дастлабки маълумотларга кўра, беморнинг ўлимига анафилактик шок сабаб бўлган, юраги номаълум омиллар туфайли тўхтаб қолган. Марҳумнинг яқинлари эса наркоз меъёрдан ортиқ берилган бўлиши мумкинлигини иддао қилмоқда.
Марҳум нафас олишдаги муаммолар сабаб бурнини операция қилдиришга қарор қилган. У жарроҳликдан олдин барча тиббий текширувлардан ўтган ва шифокорлар томонидан операцияга рухсат берилган.
12-ноябрь куни соат 11:30 да операцияга кирган беморнинг вафоти ҳақида унинг яқинларига уч соат ўтиб хабар берилган.
Оила аъзолари сўзларига кўра, бемор операциядан сўнг "операцион кийим"сиз, оддий кийимларда ётган, ёрдамчи тиббий аппаратлар кўринмаган, юз ва танадаги қонлар артилмаган.
Марҳумнинг яқинлари, шунингдек, операция ўтказилган клиника воқеадан сўнг ҳамдардлик билдирмаганидан ҳам норози.
Расмий хабарда клиника номи кўрсатилмаган. Бироқ ижтимоий тармоқларда тарқалган маълумотларга кўра, операция Олмазор туманидаги "Ibatov" клиникасида амалга оширилган бўлиши мумкин.
Олмазор тумани санитария-эпидемиологик осойишталик ва жамоат саломатлиги хизмати бўлимининг тегишли қарорига асосан хусусий клиника фаолияти расман тўхтатилган.
2025 йил 29 ноябрь куни хусусий клиника шифокорларига нисбатан Жиноят кодексининг 116-моддаси (Касб юзасидан ўз вазифаларини лозим даражада бажармаслик) билан жиноят иши қўзғатилган.
Эслатиб ўтамиз, Тошкентдаги хусусий клиникада ринопластика вақтида тўққиз ёшли бола вафот этганди. Операциядан бир ҳафта олдин у тиббий кўрикдан ўтган ва жарроҳлик амалиётига рухсат берилган. Бироқ 25 август куни ўтказилган ринопластикадан сўнг у операция хонасидан тирик чиқмаган.
Изоҳлар мавжуд емас