Ўзбекистон, Тошкент - Batafsil.uz. Эль-Пасо аэропортининг Мексика картел дронлари туфайли ёпиб қўйилгани ҳақидаги хабарлар Вашингтон ва Мехико ўртасидаги муносабатларни кескинлаштириб юборди. Дронлар наркотик ташувчиларга тааллуқли эканлиги айтилмоқда.
2026 йилнинг 12 февраль куни АҚШ расмийлари Мексика наркокартеллига тегишли дроннинг чегарани бузиб ўтганини даъво қилиб, Техасдаги Эль-Пасо халқаро аэропорти ҳаво ҳудудини бир неча соатга ёпиб қўйган. АҚШ Транспорт вазири Шон Даффи буни бевосита картеллар хавфи билан изоҳлаган бўлса-да, кейинчалик авиация экспертлари ва аноним манбалар бунга АҚШ армиясининг лазерли дронларга қарши тизими синовлари сабаб бўлган бўлиши мумкинлигини билдиришган.
Шунга қарамай, ушбу воқеа Оқ уй ва Мексика президенти Клаудия Шейнбаум маъмурияти ўртасидаги "қизил чизиқ"ларни янада яққолроқ кўрсатиб қўйган.
Президент Дональд Трамп маъмурияти Мексика картелларини "Мексикани бошқараётган кучлар" деб атаб, уларга қарши бир томонлама ҳарбий куч ишлатиш варианти стол устида эканини очиқ айтмоқда. Оқ уй матбуот котиби Ана Келли дронлар билан боғлиқ вазият икки давлат муносабатларидаги "портлаш нуқтаси" (flashpoint) бўлиши мумкинлигини тасдиқлаган. Хавфсизлик бўйича эксперт Скотт Брауннинг фикрича, аэропортнинг ёпилиши АҚШ учун Мексика ҳудудида "жавоб зарбаси" бериш учун асос ёки баҳона бўлиб хизмат қилиши мумкин.
Аввалроқ АҚШ президенти Дональд Трамп АҚШ қуролли кучлари Мексика ҳудудида қуруқликдаги операцияларни бошлаш ниятида эканлигини маълум қилганди. Унинг сўзларига кўра, улар наркокартелларга қарши йўналтирилади.
Изоҳлар мавжуд емас