Ўзбекистон, Тошкент - Batafsil.uz. Инсон ҳуқуқлари "Эзгулик" жамияти коррупцияга қарши кураш учун ажратилиши керак бўлган грант маблағлари берилмагани, тантанали топширилган сертификат эса "қуруқ қоғоз" бўлиб чиққанини даъво қилмоқда. Жамият раҳбари Абдураҳмон Ташанов Сенат қўмитаси раиси ва Антикор агентлигини судга беришга ҳозирлик кўрмоқда.
2025 йилнинг март ойида Президент Шавкат Мирзиёев томонидан ННТларни коррупцияга қарши курашга жалб қилиш учун 10 миллиард сўм ажратилиши эълон қилинган эди. Ушбу ташаббус доирасида "Эзгулик" жамияти журналист ва блогерларни ўқитиш бўйича 500 миллион сўмлик лойиҳа билан ғолиб бўлган. Бироқ, орадан вақт ўтиб, ажратилган маблағ тақдири мавҳумлигича қолмоқда.
Воқеа қуйидагича бошланган. 2025 йил август-сентябрь ойларида Парламент комиссияси қарори чиққан. Сенат қўмитаси раиси Абдуҳаким Эшмуродов "Эзгулик" жамиятига грант мукофотини тантанали равишда топширган.
2025 йил 30 декабрь куни Парламент фонди шартномани бир томонлама бекор қилган. Сабаб сифатида Антикор агентлигининг шартномани имзоламагани кўрсатилдган.
Натижада маблағлар Молия вазирлигига қайтарилган ва лойиҳа ижросиз қолган.
Жамият раҳбари Абдураҳмон Ташанов ушбу ҳолатни "кўзбўямачилик" деб атаб, Сенат қўмитаси раиси А.Эшмуродов устидан ишчанлик обрўсини ерга уриш ва маънавий зарар бўйича фуқаролик судига ариза қолдирмоқчи.
Маъмурий судга Коррупцияга қарши курашиш агентлиги раҳбариятининг ҳаракатсизлиги юзасидан шикоят киритмоқчи.
"Менга фақат гул ва 500 миллион сўм ёзилган корешок бергандингиз... Гул сўлиб қолган, аммо корешогингизни эртага ишхонангизга қайтариб юбораман", — дейди Ташанов ўз баёнотида.
Шунингдек, баёнотда маблағ берилмаслиги ортида юқори лавозимли шахслар, жумладан Президент маслаҳатчиси Руслан Давлетовнинг кўрсатмаси бўлиши мумкинлиги ҳақида тасдиқланмаган тахминлар илгари сурилган. "Эзгулик" жамияти журналист ва блогерларни ушбу жараённи кенг ёритишга ҳамда Президентнинг коррупцияга қарши кураш сиёсати қоғозда қолиб кетмаслиги учун фаол бўлишга чақирган.
Эслатиб ўтамиз, ўтган йилнинг март ойида Коррупцияга қарши курашиш миллий кенгаши йиғилишида президент Шавкат Мирзиёев Коррупцияга қарши курашиш агентлигини вазирлик ва ҳудудларда фаол ишлаш ўрнига пассив ишлаётгани, ходимларини қўзғатилган жиноят ишларини ҳисоб-китоб қиладиган статистларга айлантириб қўйганини кескин танқид қилганди.
Изоҳлар мавжуд емас