Ўзбекистон, Тошкент - Batafsil.uz. Ижтимоий тармоқларда тарқалган видеохабар Қашқадарё вилояти Мактабгача ва мактаб таълими бошқармаси томонидан ўрганилган. Вазиятга ота-оналарнинг эски бинодан фойдаланмаслик ҳақидаги талаби сабаб бўлгани айтилмоқда.
Қаҳратон кунларда болаларнинг ноқулай ва совуқ шароитда таълим олаётгани жамоатчиликнинг ҳақли эътирозларини келтириб чиқарганди. Ушбу таълим маскани Деҳқонобод тумани "Бешқўтон" маҳалласи Шакарбулоқ қишлоғидаги 80-мактаблиги аниқланган.
Унда 142 нафар ўқувчи ва 14 та синф мавжуд. Мактаб 5 та синф хонасидан иборат 80 ўринли янги бино ва эски бинодан ташкил топган. Қишнинг совуқ кунларида ота-оналар болаларини эски бинода ўқитишга эътироз билдиришган.
Мактаб раҳбарияти 14 та синфни янги бинога икки навбатда (сменада) жойлаштиришга улгурмагани сабабли, ота-оналарнинг талаби билан 2 та синф бир кунга қишлоқдаги бўш турган шахсий хонадонга кўчирилганини айтган.
Энг қизиғи, расмий муносабатда билдирилишича, ота-оналар ўзлари болаларни қишлоқдаги фуқаронинг бир неча йиллардан бери фойдаланилмай келган хонадонида дарс ўтишини талаб қилган. Мактаб маъмурияти эса буни инобатга олган. Кейинчалик эса улар талабига қарши чиқишган.
Мактабгача ва мактаб таълими бошқармасининг маълум қилишича, ҳозирда барча синфлар янги бинога тўлиқ жойлаштирилган. Ўқув жараёнлари икки навбатда ташкил этилиб, уйда дарс ўтиш ҳолатига чек қўйилган.
Изоҳлар мавжуд емас