Эпштейн иши: Янги ҳужжатларда Трамп ва Маскка оид шов-шувли иддаолар пайдо бўлди

Ўзбекистон, Тошкент - Batafsil.uz. АҚШ Адлия вазирлиги Жеффри Эпштейн ишига доир 3 миллион саҳифадан ортиқ ҳужжатни, шу жумладан 2000 дан зиёд видео ва 180 мингта тасвирни эълон қилди.

Ушбу материалларда амалдаги президент Дональд Трамп ва миллиардер Илон Маскнинг молиячи билан алоқаларига оид тасдиқланмаган, аммо шов-шувли маълумотлар ўрин олган. 

Вазирлик сайтида эълон қилиниб, қисқа вақт ичида ўчириб ташланган ҳужжатлар орасида Дональд Трампнинг Эпштейн билан шахсий алоқалари ва Илон Маскнинг "молиячи ороли"га ташриф буюриш режалари ҳақидаги қайдлар мавжуд. Мазкур архивнинг очиқланиши Конгресс томонидан қабул қилинган "Эпштейн ҳужжатларининг шаффофлиги тўғрисида"ги қонун талаби асосида амалга оширилган. 

Сиздирилган ва кейинчалик вазирлик сайтидан олиб ташланган маълумотларда бир қатор тафсилотлар келтирилган. 

Хусусан, ҳужжатларда Трампнинг 1990-йилларда Эпштейннинг шахсий самолётида камида 8 марта учгани тасдиқланган эди.

Шунингдек, Стив Бэннон ва Эпштейн ўртасидаги СМС ёзишмаларда Трампнинг номи тез-тез тилга олингани аниқланган. 

Миллиардер Илон Маскнинг Эпштейнга тегишли бўлган, вояга етмаганлар билан боғлиқ жиноятлар маркази деб кўрилган машҳур оролга ташриф буюришни режалаштирганига оид электрон ёзишмалар архивдан ўрин олган.

Материалларда Билл Гейтснинг Эпштейн билан алоқалардан сўнг соғлиғида муаммолар юзага келгани, Вуди Аллен ва Билл Клинтон каби шахсларнинг молиячи билан тушган суратлари мавжудлиги қайд этилган. 

Адлия вазирлиги тақдим этган 6 миллион саҳифалик материалнинг фақат ярми (3,5 миллиони) ошкор қилингани Демократлар томонидан кескин танқид қилинмоқда. 

Расмийлар жинсий зўравонлик қурбонларининг шахсини ҳимоя қилиш мақсадида кўплаб исмлар ва видео тасвирларни таҳрир қилган (беркитган). Видеоларда фақат Эпштейннинг шериги Гилейн Максвеллнинг юзи очиқ қолдирилган. 

Сенатдаги демократлар етакчиси Чак Шумер ва конгрессмен Ро Ханна Трампга оид барча маълумотларнинг тўлиқ очиқланишини талаб қилмоқда. 

Ҳужжатларда номи келтирилган барча шахслар, жумладан Трамп ва Маск, ҳар қандай ноқонуний хатти-ҳаракатларни ва жиноий алоқаларни қатъиян рад этиб келишмоқда. Маълумот учун, Жеффри Эпштейн 2019 йилда қамоқхонада вафот этган бўлиб, ҳозиргача фақат унинг шериги Максвеллга нисбатан айблов ҳукми чиқарилган.