Ўзбекистон, Тошкент - Batafsil.uz. Ўзбекистон атом энергетикасини ривожлантиришда навбатдаги қадамни қўйди. Саноат, радиация ва ядро хавфсизлиги қўмитаси RITM-200N ядровий қурилмаси билан энергия блокини қуриш учун лицензия берди. Қарор халқаро мутахассислар иштирокида лойиҳа ҳужжатларини комплекс экспертизадан ўтказишдан сўнг қабул қилинди.
Вазирлар Маҳкамаси ҳузуридаги Саноат, радиация ва ядро хавфсизлиги қўмитасидан маълум қилишларича, "Атом электр станциясини қуриш дирекцияси" давлат муассасаси томонидан тайёрланган лойиҳа ҳужжатлари Радиация ва ядро хавфсизлиги илмий-техник марказида ҳар томонлама ўрганиб чиқилди.
Жорий йилнинг март ойида мутахассислар бўлажак атом электр станциясининг ядровий қурилмаларини жойлаштириш учун мўлжалланган майдондан фойдаланишга рухсат берган эди.
Кейинги босқичда RITM-200N реактор қурилмасига эга энергия блокларини қуриш хавфсизлигини асословчи лойиҳа ечимлари ва материаллар кўриб чиқилди. Экспертиза миллий қонунчилик, халқаро тажриба ва Атом энергияси бўйича халқаро агентлик (МАГАТЭ) тавсияларини инобатга олган ҳолда ўтказилди.
Лойиҳани баҳолашга хорижий экспертлар ва халқаро ташкилотлар вакиллари, жумладан, Россия Федерациясининг радиация ва ядро хавфсизлиги илмий-техник маркази мутахассислари ҳам жалб этилди.
Ҳужжатларни кўриб чиқиш якунлари бўйича Қўмита Кенгаши RITM-200N ядровий қурилмаси билан энергия блокини қуриш учун лицензия бериш тўғрисида қарор қабул қилди.
Агентлик таъкидлашича, лойиҳанинг барча босқичларида лицензия шартлари ва ядро хавфсизлиги меъёрларига риоя этилиши давлат назорати остида бўлади.
Аҳоли ва атроф-муҳитни муҳофаза қилиш, шунингдек, объектни қуриш ва кейинчалик эксплуатация қилишда халқаро хавфсизлик стандартларига риоя қилиш масалаларига алоҳида эътибор қаратиш режалаштирилган.
Лицензиянинг берилиши Ўзбекистонда RITM-200N реактор технологияси асосида биринчи кичик қувватли атом электр станциясини қуришга тайёргарликнинг асосий босқичларидан бири бўлди.
Изоҳлар мавжуд емас