Ўзбекистон, Тошкент - Batafsil.uz. Бугун, 13 апрель куни Москва шаҳрида Ўзбекистон Бош вазири Абдулла Арипов ва Россия Ҳукумати раиси Михаил Мишустин раислигида Қўшма комиссиянинг олтинчи мажлиси бўлиб ўтади. Учрашувнинг асосий мавзуси стратегик тармоқлардаги қўшма лойиҳаларни ривожлантиришдан иборат.
Музокаралар кун тартибидан савдо-иқтисодий, илмий-технологик ва маданий-гуманитар ҳамкорлик масалалари ўрин олган. Томонлар саноат, энергетика (шу жумладан, тинчлик мақсадларидаги атом энергетикаси), транспорт инфратузилмаси, қишлоқ хўжалиги ва таълим соҳаларидаги алоқаларга алоҳида эътибор қаратадилар.
Ҳозирда икки давлат ўртасидаги шериклик юқори суръатларда ривожланмоқда. Ўзбекистонда Россия капитали иштирокидаги 3 мингдан ортиқ корхона, Россияда эса 700 дан зиёд Ўзбекистон фирмалари фаолият юритмоқда. Умумий қиймати 4 триллион рублни ташкил этувчи 150 га яқин инвестиция лойиҳаси амалга оширилмоқда.
Хусусан, Жиззах вилоятида "Росатом" иштирокида АЭС қурилиши бошланган бўлиб, мамлакатда қўшма технопарклар фаолият юритмоқда ва янги саноат майдончаларини ишга туширишга тайёргарлик кўрилмоқда.
Таълим соҳасида ҳам алоқалар кенгаймоқда: Ўзбекистонда Россия олий ўқув юртларининг 15 та филиали, жумладан, МДУ, МГИМО ва МИФИ фаолият кўрсатмоқда. Яқин келажакда Бауман номидаги МДТУ ва Пирогов номидаги РНИМУ филиалларини очиш режалаштирилган. Шунингдек, Ўзбекистон ЕОИИда кузатувчи давлат сифатида Евроосиё иқтисодий интеграцияси жараёнларида фаол иштирок этиб келмоқда.
Изоҳлар мавжуд емас