Ўзбекистон, Тошкент - Batafsil.uz. Таниқли Footy Headlines портали Ўзбекистон миллий терма жамоасининг янги либослари Adidas брендининг 2026 йилги Жаҳон чемпионати учун ишлаб чиқилган экипировкасига ўхшашлигини таъкидлаб чиқди. Гап маҳаллий 7SABER бренди томонидан тақдим этилган либослар ҳақида кетмоқда.
Экспертлар терма жамоанинг оқ рангдаги сафар либосини таҳлил қилиб, унинг матоси немис гиганти томонидан 2025 йил ноябрида тақдим этилган ва 2026/27 йилги мавсум учун мўлжалланган технологияларнинг аниқ нусхаси эканини аниқлашган. Хусусан, либосдаги вентиляция ва намликни чиқариш учун мўлжалланган уч полосали текстурали тўқима "Adidas"нинг энг илғор андозаларига жуда ўхшаш.
Экспертлар фикрига кўра, Footy Headlines мутахассислари спорт индустриясида бундай ҳолатлар тез-тез учраб туришини қайд этишган. Уларнинг фикрича, кичик брендлар кўпинча глобал гигантлар ишланмаларига визуаль жиҳатдан ўхшаш материалларни сотиб олишади. Бу ҳолатда 7SABER ёки уларнинг пудратчилари хорижий фабрикалардан машҳур брендлар матоларини нусхалайдиган трикотажни харид қилган бўлиши мумкин, шу боис буни қасддан қилинган плагиат деб баҳолаш қийин.
Эслатиб ўтамиз, Ўзбекистон миллий терма жамоаси ўз тарихида илк бор Жаҳон чемпионатига йўлланма олди ва янги либослар мундиал иштирокчиси мақомидаги илк форма ҳисобланади. "7SABER" компанияси 2021 йилда ташкил этилган бўлиб, яқинда терма жамоанинг Jako бренди билан ҳамкорлиги якунлангач, техник ҳомийга айланган эди.
Изоҳлар мавжуд емас