Ўзбекистон, Тошкент - Batafsil.uz. Белгия ҳукумати Тошкент шаҳрида дипломатик ваколатхонасини очишга қарор қилди. Бу муҳим қадам икки давлат ўртасидаги сиёсий, дипломатик ва иқтисодий муносабатлар янги босқичга кўтарилганидан далолат беради. Шу вақтга қадар Белгия Ўзбекистон билан алоқаларни асосан Остонадаги элчихонаси орқали юритиб келган бўлса, эндиликда бевосита Тошкентда фаолият бошлайди.
Ўзбекистон ва Белгия ўртасидаги дипломатик алоқалар 1992-йилда ўрнатилган бўлиб, мамлакатимиз 1995-йилдан буён Брюсселда ўз элчихонасига эга. Кейинги саккиз йил ичида икки томонлама ҳамкорлик, айниқса, 2025-йил октябрь ойида Президент Шавкат Мирзиёевнинг Брюсселга амалга оширган ташрифидан сўнг янада фаоллашган.
Иқтисодий кўрсаткичларга назар ташласак, товар айирбошлаш ҳажми 2020-йилдаги 70 миллион доллардан 2024-йилда 212,7 миллион долларгача ўсганини кўриш мумкин. Бугунги кунда Ўзбекистонда Белгия капитали иштирокидаги 16 та корхона муваффақиятли фаолият юритмоқда. Мамлакатимиз уларга тўқимачилик, озиқ-овқат ва кимё маҳсулотларини экспорт қилса, Белгия томонидан юқори технологияли асбоб-ускуналар ҳамда фармацевтика маҳсулотлари етказиб берилмоқда.
Халқаро экспертларнинг фикрича, Тошкентда элчихона очилиши — бу шунчаки дипломатик процедура эмас, балки Ўзбекистоннинг Европадаги стратегик ва иқтисодий шерик сифатида ўрни мустаҳкамланиб бораётганининг яққол тасдиғидир.
Изоҳлар мавжуд емас