Ўзбекистон, Тошкент - Batafsil.uz. АҚШ Молия вазирлигининг баҳолашига кўра, жорий молиявий йил якунлари бўйича федерал бюджет дефицити камида 2 триллион долларни ташкил этиши мумкин. Бу АҚШ тарихидаги энг йирик кўрсаткичлардан бирига айланади.
Оқ уй маъмурияти 2026 молиявий йилда бюджет дефицити тахминан 2,1 триллион доллар атрофида бўлишини кутаётган бўлса, облигациялар бозори экспертлари ва иштирокчилари бу рақам 2 триллион доллар атрофида шаклланишини прогноз қилмоқда. Эътиборли жиҳати, иккала кўрсаткич ҳам Конгресснинг мустақил Бюджет бошқармаси томонидан шу йилнинг феврал ойида тақдим этилган 1,8 триллион долларлик дастлабки тахминдан анча юқоридир.
"Илгари 2 триллион долларлик дефицит ҳақида ҳеч ким эшитмаган эди ва бундай ҳолат фақат жуда йирик иқтисодий инқирозлар давридагина кузатиларди. Бугунги кунда эса 2 триллион долларлик тақчилликнинг оддий одатий ҳолга (нормага) айланиб қолаётгани жуда хавотирлидир", — дея таъкидлаган Федерал бюджетга масъулият билан ёндашиш қўмитаси президенти Майя МакГиннес.
Мазкур тақчиллик АҚШ тарихидаги учинчи энг йирик кўрсаткич сифатида қайд этилиши кутилмоқда. Бу борадаги энг юқори рекорд натижа COVID-19 пандемияси авж олган 2020 молиявий йилда кузатилган бўлиб, ўшанда дефицит 3,1 триллион долларни ташкил этган. Кейинги, 2021 молиявий йилда эса иқтисодиётни қўллаб-қувватлаш учун ажратилган кескин рағбатлантирувчи харажатлар фонида бюджет тақчиллиги қарийб 2,8 триллион долларга етган.
Маълумот учун, бундан аввал АҚШнинг умумий давлат қарзи мамлакат миллий иқтисодиёти (ЯИМ) ҳажмидан ҳам ошиб кетгани расман маълум қилинган.
Изоҳлар мавжуд емас