Ўзбекистон, Тошкент - Batafsil.uz. АҚШ Конгрессида федерал ҳукуматни молиялаштириш бўйича келишувга эришилганига қарамай, жараёндаги техник кечикишлар сабабли 31 январь тонгидан мамлакатда қисман шатдаун (ҳукумат ишининг вақтинча тўхташи) бошланди.
Сенат жума куни бюджет пакетини маъқуллаган бўлса-да (71 та "ҳа", 29 та "йўқ"), ҳужжат ҳали Вакиллар палатаси томонидан тасдиқланиши керак. Қуйи палата мазкур масалани фақат 2 февраль куни кўриб чиқишни режалаштирган. Шу сабабли федерал идораларни молиялаштиришда қисқа муддатли узилиш юзага келган.
Президент Дональд Трамп ва Демократик партия вакиллари Иммиграция ва божхона хизмати (ICE) фаолиятини тартибга солиш бўйича муросага келишган. Бюджет пакетининг олтита қисмидан бештаси бўйича келишув мавжуд.
Республикачилар ва Демократлар етакчилари ушбу бюджет инқирози атиги бир неча кун давом этишини ва ҳукумат иши тез орада тўлиқ тикланишини кутишмоқда.
Эслатиб ўтамиз, 2025 йилнинг ноябрь ойида АҚШ тарихидаги энг узоқ давом этган 43 кунлик шатдаун юз берган эди. Ўшанда 750 мингга яқин давлат хизматчиси мажбурий таътилга чиқарилган.
Шатдаун вақтида фақат ҳаётий муҳим тизимлар — полиция, чегара қўриқлаш, авиадиспетчерлик ва шошилинч тиббий ёрдам хизматлари ишлашда давом этади. Бошқа федерал идоралар ходимлари ишини вақтинча тўхтатиб туришга мажбур бўлади. Бироқ, экспертларнинг фикрича, бу галги бир неча кунлик танаффус иқтисодиёт ва давлат бошқарувига сезиларли салбий таъсир кўрсатмайди.
Изоҳлар мавжуд емас