Кашмирдаги террорчилик ҳаракатидан сўнг Ҳиндистон ва Покистон уруш ёқасига келиб қолди

Ўзбекистон, Тошкент - Batafsil.uz. 22 апрелдаги қўпорувчилик ҳаракатидан сўнг Ҳиндистон Покистон фуқаролари учун амалдаги барча визаларни бекор қилди, чегарани ёпди ва сув ресурсларидан биргаликда фойдаланиш тўғрисидаги шартномани тўхтатиб, Ҳинд дарёсига киришни тўсиб қўйди. Аввалроқ Покистон дарёни тўсиб қўйишга бўлган ҳар қандай уриниш уруш ҳаракати сифатида баҳоланиши ҳақида огоҳлантирган ва бунга жавобан кўзгули чоралар кўрганди. Бу ҳақда Batafsil.uz мухбири хабар бермоқда.

Эслатиб ўтамизки, 22 апрель куни Ҳиндистон назоратидаги Жамму ва Кашмир штатида қуролланган одамлар бир гуруҳ сайёҳларга қарата ўт очган эди. 30 га яқин киши ҳалок бўлди. Бу ҳужум учун жавобгарликни ўзини "Кашмир қаршилиги" деб атайдиган гуруҳ ўз зиммасига олган. Ҳиндистон ҳужумни Покистон билан боғламоқда, бироқ Покистон расмийлари бу терактга алоқадорлигини рад этмоқда.

Ҳужумдан сўнг Ҳиндистон Покистон ҳарбий атташеларини чиқариб юбориш, Покистон фуқаролари учун амалдаги визаларни бекор қилиш, қуруқликдаги транзит пунктини ёпиш ва сув ресурсларидан биргаликда фойдаланиш тўғрисидаги шартноманинг амал қилишини тўхтатиш каби бир қатор чораларни эълон қилди.

Ҳиндистон ТИВ баёнотида айтилишича, Ҳиндистонда бўлиб турган Покистон фуқаролари 27 апрелга қадар мамлакатни тарк этишлари керак. Тиббий визалар 29 апрелгача амал қилади.

Бундан ташқари, Ҳиндистон Ҳинд дарёсининг Покистон йўналишидаги оқимини тўсиб қўйди, тўғонлар ва каналлар орқали сув оқимини назорат қилувчи барча тўртта шлюзни ёпди, бу 1960 йилдаги Ҳинд сувлари тўғрисидаги келишувдан бери биринчи марта юз берди. Аввалроқ Покистон бундай тўсиқ уруш акти сифатида баҳоланиши ҳақида огоҳлантирганди.

Покистон бунга жавобан Ҳиндистон билан барча товар айирбошлашни тўхтатди ва барча ҳинд авиакомпаниялари учун ўз ҳаво ҳудудини ёпди. Исломобод Ҳиндистон фуқароларига Покистонни тарк этишни буюрди ва визадан озод қилиш дастури (СААРC) бўйича берилган визалар тўхтатилишини эълон қилди. Бундан ташқари, Покистон Ҳиндистоннинг Исломободдаги мудофаа, ҳарбий-денгиз кучлари ва авиация бўйича маслаҳатчиларини тарк этишни талаб қилган.