Ўзбекистон, Тошкент - Batafsil.uz. Парижда бўлиб ўтган саммит якунида эълон қилинган хавфсизлик кафолатлари бўйича қўшма баёнотдан Вашингтоннинг Украинани тўғридан-тўғри ҳимоя қилишига оид муҳим бандлар чиқариб ташланди.
Гарчи саммитда АҚШ вакиллари Стив Виткофф ва Жаред Кушнер иштирок этиб, Украинани қўллаб-қувватлашини билдирган бўлса-да, якуний ҳужжатни АҚШ расман имзоламаган. Декларация фақатгина Европа давлатларидан иборат "хоҳиш билдирган давлатлар коалицияси" томонидан тасдиқланган. Энг муҳими, ҳужжатнинг дастлабки лойиҳасида кўзда тутилган АҚШнинг ҳарбий кафолатлари охирги вариантда ўз аксини топмаган.
Декларациянинг дастлабки вариантида АҚШ "халқаро кучларга ҳужум қилинган тақдирда уларни қўллаб-қувватлаш" мажбуриятини олиши кўрсатилган эди, бироқ якуний матнда бу банд акс этмаган.
Вашингтон хавфсизлик протоколларини маъқулласа-да, баёнотни имзолаган томонлар рўйхатига кирмаган. Бу эса АҚШнинг келгусидаги мажбуриятлари қанчалик ҳуқуқий кучга эга экани борасида шубҳаларни юзага келтирмоқда.
АҚШ фақатгина ўт очишни тўхтатиш режимини мониторинг қилиш ва разведка маълумотлари билан бўлишиш каби техник ва логистик ёрдам билан чекланиши маълум бўлган.
Франция президенти Эммануэль Макрон АҚШнинг "орқада туриб қўллаши" етарли эканини айтса-да, амалда асосий ҳарбий юк Европа давлатлари, хусусан, Британия ва Франция зиммасига тушмоқда. Украина президенти Владимир Зеленский эса бу кафолатлар ҳақиқий кучга эга бўлиши учун улар албатта АҚШ Конгресси томонидан қонун сифатида қабул қилиниши шартлигини таъкидлаган.
Айни дамда АҚШнинг ушбу эҳтиёткор позицияси Дональд Трамп маъмуриятининг Украина бўйича келажакдаги режалари ҳали тўлиқ аниқ эмаслигидан далолат бермоқда.
Эслатиб ўтамиз, аввалроқ АҚШ раҳбари Путиннинг Валдайдаги қароргоҳига Украина томонидан дрон ҳужуми уюштирилгани ҳақидаги иддаоларини рад этганди ва Россия иқтисодиётини янада заифлаштириш учун янги санкциялар қўлланишига шаъма қилган эди.
Изоҳлар мавжуд емас