Ўзбекистон, Тошкент - Batafsil.uz. АҚШ Президенти Дональд Трамп Путиннинг Валдайдаги қароргоҳига Украина томонидан дрон ҳужуми уюштирилгани ҳақидаги иддаоларини рад этди ва Россия иқтисодиётини янада заифлаштириш учун янги санкциялар қўлланишига шаъма қилди.
Президент Дональд Трамп 4 январь куни журналистлар билан суҳбатда Россия томонининг декабрь ойи охирида Путиннинг Валдайдаги резиденциясига Украина томонидан ҳужум уюштирилгани ҳақидаги баёнотларини "ёлғон" деб атаган. Трампнинг таъкидлашича, маълумотлар текширилгандан сўнг, бундай зарба берилганига далил топилмаган. Дастлаб ушбу "ҳужум"дан ғазабланганини эса ўша вақтда вазият ҳақида ҳали тўлиқ маълумотга эга бўлмагани билан изоҳлаган.
Россия Мудофаа вазирлиги гўёки резиденцияга ҳужум қилган дроннинг "контроллерини" АҚШ томонига топширганини даъво қилган. Бироқ Трамп бунга ишонмаслигини билдирган. Украина Президенти Владимир Зеленский эса Москванинг бундай баёнотларини тинчлик музокараларига тўсқинлик қилиш ва Украина давлат биноларига зарба бериш учун "замин ҳозирлаш" деб баҳолаган.
Хусусан, Россия Мудофаа вазирлиги ва Ҳаво-космик кучлари (ВКС) 28 декабрь куни президент Путин қароргоҳига уюштирилган ҳужум Украина томонидан қилинганини очиқлаган эди.
Брифинг давомида Трамп сенатор Линдси Грэмга сўз бериб, Россияга қарши янги иқтисодий уруш режасини очиқлаган.
Унга кўра, АҚШ маъмурияти Россия нефтини сотиб олишни давом эттираётган мамлакатларга (Россиянинг 85 та "ҳомийси") қарши санкцияларни муҳокама қилмоқда.
Янги қонун лойиҳаси Россия нефтини сотиб олувчи давлатлардан келадиган маҳсулотларга 500 фоизгача божхона тўловларини жорий этишни кўзда тутади.
Грэмнинг айтишича, АҚШ божларни ошириш билан таҳдид қилгандан сўнг, Ҳиндистон Россиядан нефть сотиб олишни сезиларли даражада камайтирган ва бу усул самарали эканини исботлаган.
Трамп Украинадаги урушни тўхтатиш учун аниқ муддат йўқлигини, аммо можаро тезроқ тугашидан умидворлигини айтган. Шу билан бирга, у Россия иқтисодиёти ҳозирда жуда аянчли ҳолатда эканини алоҳида қайд этган. Трампнинг фикрича, иқтисодий босим Россияни тинчликка мажбур қилишнинг энг самарали йўлидир.
Изоҳлар мавжуд емас