Ўзбекистон, Тошкент - Batafsil.uz. Ўзбекистондаги йирик телекоммуникация оператори — Universal Mobile Systems (MobiUz) компанияси устав капиталидаги 100 фоиз давлат улушини хусусийлаштириш жараёни муваффақиятли якунланди. Давлат активларини бошқариш агентлиги хабарига кўра, очиқ савдолар натижасида АҚШнинг McKim and Company компанияси бошчилигидаги компания ғолиб деб топилган.
Битим шартларига кўра, MobiUz компаниясининг бозор қиймати 351 миллион доллар деб баҳоланган. Шунингдек, харидорлар телекоммуникация инфратузилмасини тубдан янгилаш ва ривожлантириш учун 500 миллион долларгача миқдорида инвестиция киритиш мажбуриятини олган. Мутахассислар битимнинг иқтисодий самарадорлигини юқори баҳолаб, компаниянинг молиявий самарадорлиги ва унинг бозордаги баҳоси адолатли эканини қайд этганлар.
Хусусийлаштириш жараёни халқаро стандартлар асосида, Rothschild & Co инвестиция банки стратегик консультантлигида ўтказилган. Савдолар давомида АҚШ, Япония, Европа ва Форс кўрфази мамлакатларидан 15 дан ортиқ халқаро инвесторлар фаол иштирок этган. Талабгорлар учун KPMG ва Deloitte компаниялари молиявий таҳлил ва баҳолаш ишларини олиб борган.
Мазкур битимни ҳуқуқий жиҳатдан расмийлаштириш ҳамда якунлаш учун тегишли тартибга солувчи органлардан рухсатномалар олиш, шунингдек, корпоратив ва ҳуқуқий тартиб-таомилларни амалга ошириш талаб этилади. Давлат активлари агентлиги ушбу жараён Ўзбекистон телекоммуникация бозорига халқаро илғор технологиялар ва капитал кириб келишида муҳим қадам бўлганини таъкидлаган.
Изоҳлар мавжуд емас