Ўзбекистон, Тошкент - Batafsil.uz. Ўзбекистон Республикаси Марказий банки ходимларга ўз иш ҳақини қайси банк картасига олишни мустақил ва эркин танлаш имконини берувчи "Тақсим" тизимини ишлаб чиқди. Янги механизмнинг жорий этилиши натижасида, иш берувчи ташкилот қайси тижорат банки билан ҳамкорлик қилишидан қатъи назар, ходимлар ўзларига қулай бўлган исталган банк картаси ёки электрон ҳамён орқали маош олиш имкониятига эга бўладилар.
Бугунги кунда кўплаб ташкилот ва корхоналар иш ҳақи лойиҳаларини фақатгина ўзлари шартнома тузган муайян ҳамкор банклар орқали амалга ошириб келмоқда. Бу эса ходимларни айнан ўша банк картасини очишга ва ундан фойдаланишга мажбур қилаётган эди. Янги ишлаб чиқилган тизим мана шундай чекловларга барҳам беришни ҳамда чакана банк хизматлари бозорида соғлом рақобатни сезиларли даражада кучайтиришни мақсад қилган.
Мазкур лойиҳа 2025 йил 27 ноябрда қабул қилинган Президент қарори ижроси доирасида амалга оширилмоқда. Ушбу ҳужжатга мувофиқ, Марказий банк 2026 йилнинг июнь ойига қадар ўз бошқарувидаги тўлов тизимларида оммавий (тўпламли) тўловлар функциясини йўлга қўйиши лозим эди.
Бироқ, лойиҳани дастлабки режа бўйича 2026 йил 30 июнгача ишга тушириш белгиланган бўлса-да, унинг муддати бироз узайтирилган. Бунга айрим тижорат банкларининг янги тизим билан интеграциялашув жараёнига техник жиҳатдан тўлиқ тайёр эмаслиги сабаб бўлган. Ҳозирча "Тақсим" тизимининг якуний ишга туширилиш санаси бўйича янги муддатлар расман эълон қилингани йўқ.
Изоҳлар мавжуд емас