Ўзбекистон, Тошкент - Batafsil.uz. Жаҳон соғлиқни сақлаш ташкилоти (ЖССТ) MV Hondius круиз лайнерида бошланган хантавирус тарқалиши расман якунланганини маълум қилди. Ташкилот бош директори Тедрос Адханом Гебрейесуснинг сўзларига кўра, касалланганлар билан алоқада бўлиб, назоратга олинган сўнгги йўловчи ҳам карантин муддатини тугатиб, салбий тест натижасини олган ва уйига қайтган. Жорий йилнинг 25 майидан буён янги касалланиш ҳолатлари қайд этилмагани боис, ташкилот эпидемияни бутунлай бартараф этилган деб ҳисобламоқда.
Мазкур вирус билан боғлиқ фавқулодда вазият шу йилнинг 1 апрель куни 23 та давлатдан 147 нафар йўловчи ва экипаж аъзолари билан Аргентинадан денгизга чиққан "MV Hondius" лайнерида бошланган эди. Дастлабки бемор 6 апрелда ўзини нохуш ҳис қилган ва кеманинг ўзида вафот этган, унинг турмуш ўртоғи эса Жанубий Африка Республикасига эвакуация қилинганидан сўнг ҳаётдан кўз юмган.
Эпидемиологик суриштирувларга кўра, эр-хотин кемага чиқишдан олдин Аргентина, Чили ва Уругвай бўйлаб қушларни кузатувчилар тури доирасида саёҳат қилган ва маршрут вирус ташувчиси бўлган кемирувчилар яшайдиган ҳудудлардан ўтган.
Лайнер 10 май куни Испаниянинг Тенерифе оролига етиб келгач, йўловчиларнинг катта қисми эвакуация қилиниб, ватанларига репатриация қилинган эди. Ушбу халқаро миқёсдаги занжирли касалланиш давомида жами 13 киши вирусни юқтириб олган ва улардан 3 нафари вафот этган. Мутахассисларнинг аниқлашича, эпидемияга хантавируснинг камёб штамми ҳисобланган "Анд" вируси сабаб бўлган.
Изоҳлар мавжуд емас