Ўзбекистон, Тошкент - Batafsil.uz. Санкт-Петербург губернатори Александр Беглов еттинчи қаватдан тушиб кетган болани тутиб қолиб, унинг ҳаётини сақлаб қолган Хайрулло Ибадуллаевни "Қутқарувдаги жасорати учун" кўкрак нишони билан тақдирлади. Смольнийда бўлиб ўтган расмий маросимда губернатор Ибадуллаевнинг мардлиги ва фидойилигини алоҳида эътироф этиб, унга фахрий белгидан ташқари эсдалик соатларини ҳам топширди.
Ҳодиса 22 февраль куни, болакай очиқ дераза ёнида ўйнаб ўтирган вақтида содир бўлган. Бола сирпаниб кетиб, дераза карнизига осилиб қолган. Шу атрофда ишлаётган Хайрулло Ибодуллаев вазиятни пайқаб, болани қутқариш учун пастда тайёр турган. Боланинг қўлларида куч қолмай пастга қулаганда, Ибодуллаев уни тутиб қолган. Қутқарув жараёнида ишчининг ўзи ҳам жароҳат олган, бироқ унинг фидойилиги туфайли бола омон қолган. Губернатор ўз нутқида ушбу ҳаракатни ҳақиқий эркакча жасорат деб атаб, бутун шаҳар номидан миннатдорчилик билдирган.
Маълумот ўрнида, Хайрулло Ибадуллаев 2025 йилнинг декабрь ойидан буён Санкт-Петербург шаҳридаги клининг компанияларидан бирида меҳнат қилиб келмоқда. Унинг ушбу жасорати шаҳар жамоатчилиги ўртасида катта акс-садо берган ва губернатор томонидан берилган мукофот унинг хизматларига юқори баҳо сифатида эътироф этилган.
Аввалроқ у Ўзбекистон Президенти фармони билан давлат мукофотига лойиқ кўрилганди ва Россияда пул мукофоти билан тақдирланган эди. Шунингдек, соддалаштирилган схема бўйича Россия фуқаролигини олиши мумкинлигини хабар қилган эдик.
Изоҳлар мавжуд емас