Ўзбекистон, Тошкент - Batafsil.uz. Қўқон шаҳридаги хусусий клиникалардан бирида шифокорга тан жароҳати етказган рашкчи эр маъмурий жавобгарликка тортилди. Мазкур ҳолат шифохонадаги кузатув камераларига муҳрланган.
Ҳодиса жорий йилнинг 9 апрель куни соат 14:00 атрофида юз берган. Клиникага турмуш ўртоғини тиббий кўрик учун олиб келган фуқаро шифокорнинг хизмат вазифасини бажариш жараёнидан нотўғри гумон қилиб, рашк сабабли низо чиқарган. Шифокорнинг тушунтиришларига қарамай, бемор ва унинг эри шифохонани тарк этган. Бироқ орадан бироз вақт ўтиб, фуқаро ўзининг танишлари билан клиникага қайтиб келиб, шифокорни кўчага имлаб чиқарган ва унга нисбатан жисмоний куч ишлатган.
Жабрланувчининг сўзларига кўра, низо тиббий аппаратларни улаш ва беморни кўрикка тайёрлаш жараёнида бошланган. Эр аёлини текширтириш жараёнида шифокорнинг эшикни тақиллатмай кирганига норозилик билдирган. Шифокор эса аёлнинг бел қисмини текширмоқчи бўлган. "Бу менинг иш жойим, аппаратларни улашим кераклигини айтдим, лекин у киши рашк қилиб тўполон кўтарди. ", — дейди калтакланган тиббиёт ходими. У, шуниндек, муштлашувда унга зарар етмаганини, фақатгина ўз айби билан оёғи тойиб йиқилганини таъкидлаган. Аммо кадрларда даҳанака муштлашув бўлганини кўришимиз мумкин. Унда шифокор ҳам қаршилик кўрсатган.
Мазкур ҳолат юзасидан Фарғона вилояти ИИБ томонидан суриштирув ишлари олиб борилган. Ҳуқуқбузарларга нисбатан Ўзбекистон Республикаси Маъмурий жавобгарлик тўғрисидаги кодекснинг 183-моддаси (Майда безорилик) ва 52-моддаси (Енгил тан жароҳати етказиш) билан ҳужжатлар расмийлаштирилиб, судга юборилган.
Суд қарорига кўра, муштлашувда иштирок этган шахсларнинг ҳар бирига базавий ҳисоблаш миқдорининг 10 баравари миқдорида жарима жазоси тайинланган. Мутасаддилар шифокор ўз хизмат вазифасини бажараётган шахс эканлигини ва унга нисбатан куч ишлатиш қонуний оқибатларга олиб келишини яна бир бор эслатиб ўтмоқда.
Эслатиб ўтамиз, Тошкентда навбатчилик вақтида беморнинг яқини томонидан аёвсиз калтакланган шифокор аёл хам икки йилдан буён адолат изламоқда. Унга оғир жароҳат етказган шахс нафақат жиноий жавобгарликдан қутулиб қолган, балки ҳозирда ички ишлар органларида маҳалла ҳуқуқ-тартибот ходими (участковой) сифатида фаолият юритмоқда.
Изоҳлар мавжуд емас