Ўзбекистон, Тошкент - Batafsil.uz. 2026 йилнинг 10 сентябрь куни Олий Мажлис Сенатининг 19-ялпи мажлисида "Ўзбекистон Республикасининг Давлат чегарасини қўриқлаш ва ҳимоя қилишни янада кучайтиришга қаратилган ўзгартириш ва қўшимчалар киритиш тўғрисида"ги қонун маъқулланди. Ҳужжат билан Жиноят кодексига давлат чегараси орқали ноқонуний ерости туннеллари ва инфратузилма объектларини қуриш, улардан фойдаланиш, ушбу фаолиятни ташкил этиш ҳамда молиялаштириш учун алоҳида жиноий жавобгарлик киритилмоқда.
Сенатнинг Мудофаа ва хавфсизлик масалалари қўмитаси раиси Қутбиддин Бурҳоновнинг бугунги йиғилишда маълум қилишича, 2016–2025 йилларда давлат чегарасида 12 та ноқонуний ерости иншооти аниқланган.
Хусусан, Фарғона ва Андижон вилоятларидаги туннеллар орқали божхона назоратидан яширин равишда 30 миллиард сўмдан ортиқ товар-моддий бойликлар, 3,7 миллион доллар ҳамда 5 килограммдан ортиқ олтин ёмбилари мамлакатга олиб кирилган. 2023 йилда Андижон вилоятида аниқланган 400 метрдан ортиқ узунликдаги туннель эса 10–12 метр чуқурликда жойлашган бўлиб, электр ёритиш ва ҳаво алмашиш тизимлари билан жиҳозланган.
Қонунга мувофиқ, туннеллардан фойдаланган ҳолда давлат чегарасини кесиб ўтиш ва контрабанда жиноятларини содир этиш учун жавобгарлик кучайтирилмоқда.
Шу билан бирга, инсонпарварлик тамойилидан келиб чиқиб, биринчи марта ушбу қилмишни содир этган шахс ўз ихтиёри билан давлат органларига туннель ҳақида хабар берса ёки жиноятни фош этишга фаол кўмаклашса ва унинг ҳаракатларида бошқа жиноят таркиби бўлмаса, жиноий жавобгарликдан озод этилади.
Бундан ташқари, Жиноят-процессуал кодексига киритилган ўзгартишларга кўра, давлат чегараси орқали ноқонуний ерости туннелларини қуриш ва улардан фойдаланиш билан боғлиқ жиноятлар бўйича дастлабки терговни Давлат хавфсизлик хизмати (ДХХ) органлари амалга ошириши белгиланган.
Изоҳлар мавжуд емас