Ўзбекистон, Тошкент - Batafsil.uz. Ўзбекистонда ер участкаларини "тайёр пакетлар" кўринишида сотиш механизми жорий этилди. Ҳокимликлар олдиндан тайёрланган техник шартлар ва қурилиш учун зарур рухсатномалар билан ерни аукционга чиқариши мумкин бўлади.
Бу хусусийлаштиришни жадаллаштириш тўғрисидаги 177- сон президент фармонида назарда тутилган. Бундай “пакет”ни тайёрлаш харажатлари маҳаллий бюджетдан қопланади ва кейин лотнинг бошланғич нархига киритилади. Янги механизм биринчи навбатда мастер-режалар ишлаб чиқилган ҳудудларда қўлланилади.
Агар нарх пасайтирилгандан сўнг ер участкасини сотишнинг иложи бўлмаса, уни компаниянинг устав капиталидаги улуш эвазига лойиҳани амалга ошириш учун бизнесга беришлари мумкин. Кейинчалик тадбиркор ушбу улушни қайтариб сотиб олиши мумкин бўлади.
Бундан ташқари, давлат мулки қийматининг камида 50 фоизини тўлаган инвесторларга сотиб олинган объектларни реконструкция қилиш ёки янги қурилиш учун бузишга рухсат берилади. Тошкент шаҳридаги саноат зоналари иштирокчилари инвестиция ва ижтимоий мажбуриятларни бажаргандан сўнг бино ва ерни сотиб олишлари мумкин бўлади.
Аввалроқ Ўзбекистонда ер участкаларини қурилишга тайёр рухсатномалар билан аукционга чиқариш режалаштирилаётгани хабар қилинганди. Ўшанда тадбиркорлар рухсат берувчи ҳужжатларни олиш учун 6 ойдан 12 ойгача вақт сарфламасдан, ер сотиб олгандан сўнг дарҳол қурилишни бошлашлари мумкинлиги қайд этилган эди.
Изоҳлар мавжуд емас