Ўзбекистон, Тошкент - Batafsil.uz. Бухоро вилоятида 40 нафар боғча тарбияланувчисини ташиган автобус ҳайдовчиси маст ҳолда бошқаргани аниқланган. Суд қарорига кўра, у ҳайдовчилик ҳуқуқидан уч йил муддатга маҳрум этилди ва катта миқдорда жарима тўлайди.
Ҳодиса Ромитан туманида содир бўлган. Йўл-патрул хизмати ходимлари режали текширув давомида боғча болалари бўлган автобусни тўхтатган. Текширув пайтида ҳайдовчининг маст экани аниқланган.
Маълумотларга кўра, у ЙПХ ходимларининг талабларига бўйсунмасдан, ҳаракатни давом эттиришга ҳам уриниб кўрган.
Ушбу ҳолат бўйича ҳайдовчига нисбатан бир нечта модда бўйича — маст ҳолда транспорт бошқариш, йўловчиларни ташиш қоидаларини бузиш ва ҳуқуқни муҳофаза қилувчи органлар талабларига бўйсунмаслик юзасидан маъмурий баённомалар расмийлаштирилган.
Суд қарори билан унга 40 баробар базавий ҳисоблаш миқдори — 16,48 миллион сўм жарима тайинланган. Шунингдек, у барча транспорт воситаларини бошқариш ҳуқуқидан 3 йил муддатга маҳрум этилган.
Эслатиб ўтамиз, аввалроқ Навоий вилоятида 14 нафар тарбияланувчини ташиган Matiz автомобили ағдарилиб кетгани, рулдаги аёлда ҳайдовчилик гувоҳномаси бўлмагани ва у ҳаракат вақтида назоратни йўқотгани ҳақида хабар берилган эди.
Изоҳлар мавжуд емас