Ўзбекистон, Тошкент - Batafsil.uz. Польшада хантавирус юқтирган бўлиши мумкин бўлган шахс биринчи марта санитар назоратга олинди. Мамлакат Бош санитар инспекцияси маълумотига кўра, у Атлантика океанида хантавирус тарқалган MV Hondius круиз лайнери йўловчилари билан алоқада бўлган. Ҳозирча унда касаллик аломатлари кузатилмаган, аммо унинг аҳволи етти кун давомида кузатилади.
Европа ОАВларининг хабар беришича, Польша санитар хизматлари лайнер йўловчилари билан мулоқотда бўлган бошқа шахсларни ҳам аниқлашга киришган. MV Hondius кемаси ҳозир Канар ороллари томон ҳаракатланмоқда. Бортда Польша фуқароси бўлган капитан ва бир нечта хорижлик экипаж аъзолари қолмоқда.
RMF24 ва The Warsaw маълумотларига кўра, ҳозирча бу ҳолат расман карантин эмас, балки профилактик санитар кузатув ҳисобланади. Назорат остидаги шахсга ўзини мустақил кузатиб бориш ва санитар идоралар билан алоқада бўлиш тавсия қилинган.
Жаҳон соғлиқни сақлаш ташкилоти маълумотларига кўра, MV Hondius лайнерида қайд этилган хантавирус ўчоғида камида саккиз киши касалланган, уч нафар бемор вафот этган. Вируснинг Andes тури кам ҳолларда одамдан одамга юқиши мумкинлиги айтилмоқда.
Мутахассислар хантавирус асосан кемирувчилар орқали юқишини таъкидламоқда. Инфекция юққанда иситма, бош оғриғи, мушакларда оғриқ ва нафас етишмовчилиги кузатилиши мумкин.
Аввалроқ Атлантика океанидаги MV Hondius круиз лайнерида хантавирус тарқалиши оқибатида уч киши ҳалок бўлгани хабар қилинган эди. Шунингдек, Исроилда касалликнинг илк ҳолати қайд этилгани, Испанияда эса кема йўловчилари устидан кучайтирилган тиббий назорат ўрнатилгани маълум қилинган.
Изоҳлар мавжуд емас