Ўзбекистон, Тошкент - Batafsil.uz. Давлат хавфсизлик хизмати томонидан республиканинг қатор ҳудудларида ўтказилган тезкор тадбирлар давомида қимматбаҳо металлар контрабандаси ва ноқонуний савдоси ҳолатлари аниқланган. Мусодара қилинган қимматбаҳо буюмларнинг умумий қиймати, дастлабки ҳисоб-китобларга кўра, 900 миллион сўмдан ошган.
Бухоро вилоятида ДХХ ходимлари божхона ва ИИБ вакиллари билан ҳамкорликда Шофиркон туманида қўлбола усулда ясалган 110 граммлик олтин қуймаларни сотмоқчи бўлган икки нафар йигитларни қўлга олди. Келишув суммаси 17 минг долларни ташкил қилиши керак эди. Кейинги ҳаракатлар давомида уларнинг шеригида эритиш ускуналари, прекурсорлар ва газ баллонлари билан жиҳозланган яширин лаборатория аниқланган. Экспертиза мусодара қилинган олтинни қарийб 210 миллион сўмга баҳолаган.
Шу билан бирга, Тошкент халқаро аэропортида хориждан келган 46 ёшли чет эл фуқароси қўлга олинган. Кўздан кечирилганда, эркак 290 миллион сўмдан ортиқ қийматдаги 226 грамм тилла буюмларни пойабзал ичига яшириб, божхона назоратидан ўтказмоқчи бўлгани аниқланган.
Яна бир ҳолат Андижон вилоятидаги "Дўстлик" чегара постида қайд этилди. Қирғизистондан қайтаётган андижонлик 29 ёшли йигитдан 241 граммлик заргарлик буюмлари топилди. Кейинчалик қайта сотиш учун Туркиядан олиб келинган контрабанда юкининг дастлабки нархи тахминан 400 миллион сўмни ташкил этган.
Аниқланган барча ҳолатлар юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
Изоҳлар мавжуд емас