Ўзбекистон, Тошкент - Batafsil.uz. Ички ишлар вазирлиги мутасаддилари жамоатчиликда "Равшан Золотой" номи билан танилган Равшан Муҳитдиновга нисбатан халқаро қидирув бекор қилиниши сабабларини очиқлади. Тошкент шаҳар ИИББ бошлиғи ўринбосари полковник Дилмурод Мирсодиқовнинг маълум қилишича, қидирув 2021 йилги жиноят иши доирасида эълон қилинган.
У билан боғлиқ маълумотлар жорий йилнинг апрель ойида қайта жонланганди ва у Интерпол орқали халқаро қидирувга берилган эди. Бугун журналистлар билан очиқ мулоқотда билдирилишича, вақт ўтиши билан жавобгарликка тортиш муддати тугаган. Шу сабабли ишнинг унга тегишли қисми тугатилган.
ИИББ мулозимининг таъкидлашича, кейинчалик Муҳитдиновга нисбатан бошқа аризалар ҳам келиб тушгани сабабли қидирув ҳаракатлари қайта жадаллаштирилган. Бироқ тегишли тергов ҳаракатлари давомида янги айбловлар ўз тасдиғини топмагач, унга нисбатан эълон қилинган қолган қидирув ҳаракатлари ҳам бутунлай бекор қилинган.
Маълумот ўрнида, 37 ёшли (1988 йилда туғилган) Равшан Муҳитдинов Ўзбекистон Жиноят кодексининг 173-моддаси 3-қисми (мулкни қасддан йўқ қилиш ёки шикастлаш), 242-моддаси 2-қисми (жиноий уюшма ташкил этиш) ва 277-моддаси 3-қисми (безорилик) билан айбланаётган эди. Жорий йилнинг апрель ойи ўрталарида унинг Интерпол қидирувига берилгани маълум бўлганди.
Изоҳлар мавжуд емас