Ўзбекистон, Тошкент - Batafsil.uz. Амалдаги жаҳон чемпиони Аргентина терма жамоаси Жаҳон чемпионати 1/8 финал босқичида Мисрни 3:2 ҳисобида мағлуб этиб, мусобақанинг чорак финалига йўл олди. Бешта гол урилган ва кескин курашларга бой кечган учрашувда ғолиб номи фақат қўшимча вақтда аниқланди. Бироқ учрашувдан кейин асосий муҳокамалар ғолиб жамоа ёки ўйин сифати эмас, балки ҳакамлар бригадаси ва VAR томонидан қабул қилинган қарорлар атрофида кечмоқда.
Учрашувда ҳисобни дастлаб 15-дақиқада Миср очди ва узоқ вақт устунликни сақлаб турди. Иккинчи бўлимда эса Миср қарши ҳужумлар орқали хавфли вазиятлар яратиб, 67-дақиқада устунлигини мустаҳкамлади. Шундан сўнг Аргентина ташаббусни ўз қўлига олди. 79-дақиқада Кристиан Ромеро ҳисобни қисқартирди, орадан тўрт дақиқа ўтиб эса Лионел Месси мувозанатни тиклади.
Ўйин қўшимча вақтга йўл олди. Қўшимча бўлимнинг иккинчи дақиқасида Энцо Фернандес боши билан гол киритиб, Аргентияга 3:2 ҳисобида ғалаба келтирди.
Аммо бу ғалаба футбол ишқибозлари орасида илиқ кутиб олинмади. Футбол жамоатчилигида энг кўп муҳокама қилинган вазиятлар қаторига Аргентина фойдасига белгиланган пенальти, Мисрнинг бекор қилинган голи ҳамда ўйиннинг ҳал қилувчи паллаларидаги бир қатор баҳсли қарорлар кирди. Турли мамлакатлардан бўлган таниқли мураббийлар ва собиқ футболчилар мазкур эпизодларга танқидий муносабат билдирган.
Германиялик мутахассис Юрген Клопп учрашувдан кейинги фикрида айрим қарорлар бир томон манфаатига қабул қилингандек таассурот уйғотганини таъкидлаган. Унинг айтишича, Мисрнинг бекор қилинган голи ўйиннинг энг баҳсли эпизодларидан бири бўлган.
Португалиялик мураббий Жозе Моуринью эса Аргентинанинг кучли жамоа эканини ва 0:2 ҳисобидан қайтиш учун катта ирода талаб қилинишига эътибор қаратган. Шу билан бирга, у ҳакамлик қарорлари тўғри бўлганида учрашув бошқача якунланиши ҳам мумкинлигини қайд этган.
"Аргентина ёрдамсиз ҳам ғалаба қозонишга қодир жамоа. Аммо ўйин қандай бошқарилгани ортиқча саволларни келтириб чиқарди", — деган Моуринью.
Англиялик собиқ футболчилар Жейми Каррагер ва Рой Кин ҳам айрим қарорларга қўшилмаганини билдирган. Каррагернинг фикрича, Мисрнинг бекор қилинган голи қоидалар нуқтаи назаридан ҳисобланиши керак эди. Рой Кин эса Аргентина фойдасига белгиланган пенальти баҳсли қарор бўлганини таъкидлаб, машҳур футболчилар иштирокидаги эпизодларга баъзан бошқачароқ ёндашув кузатилишини айтган.
Уэйн Руни ҳам VAR ишига танқидий баҳо берган. Унинг фикрича, ҳал қилувчи паллада видеорефери тизими ўз вазифасини тўлиқ бажармаган ва пенальти белгиланмаслиги лозим эди.
Бразилиялик Марсело эса бош ҳакам аввал ўйинни давом эттириб, кейин VAR чақирувидан сўнг қарорини ўзгартиргани саволлар уйғотганини билдирган. Унинг қайд этишича, ўхшаш вазиятлар аввалги йилларда қоидабузарлик сифатида баҳоланмаган.
Англия терма жамоасининг собиқ ҳимоячиси Рио Фердинанд футболда қоидалар барча жамоалар учун бир хил қўлланилиши лозимлигини таъкидлаган. Унинг фикрича, мухлисларнинг асосий эътирози натижага эмас, балки ҳакамликдаги изчилликка қаратилган. Шунингдек, у Энсо Фернандеснинг ғалаба голи олдидан Миср футболчилари талаб қилган қоидабузарлик эпизоди етарлича кўриб чиқилмаганини айтган.
Мексикалик ҳужумчи Хавьер Эрнандес (Чичарито) бекор қилинган гол жуда енгил асос билан инобатга олинмаганини таъкидлаган. Златан Ибрагимович эса Миср жамоаси намойиш этган ўйинни юқори баҳолаб, жамоа натижадан қатъи назар муносиб ҳаракат қилганини билдирган.
Шу билан бирга, собиқ футболчи Яя Туре ФИФА раҳбариятининг ўйин давомидаги айрим ҳолатларига ишора қилиб, турли тахминларни ўртага ташлаган. Бироқ ҳозирча мазкур даъволарни тасдиқлайдиган расмий далиллар ёки ФИФА томонидан билдирилган муносабат мавжуд эмас.
Айни пайтда ҳакамлар қарори ёки VAR ҳаракатлари бўйича ФИФА расмий изоҳ бермаган. Шунга қарамай, Аргентина — Миср учрашуви Жаҳон чемпионатининг энг баҳсли ўйинларидан бири сифатида футбол жамоатчилигида кенг муҳокама қилинишида давом этмоқда.
Изоҳлар мавжуд емас