Ўзбекистон, Тошкент - Batafsil.uz. Италиянинг Ўзбекистондаги собиқ элчиси Пьергабриэле Пападиа де Боттини ди Сант’Аньезе ҳамда унинг ёрдамчиси Татьяна Тараканова Шенген визаларини ноқонуний бериш тизимини ташкил этганликда айбланмоқда.
Хабарларга кўра, Рим прокуратураси ва Италия Молия гвардияси томонидан олиб борилган тергов натижасида Тошкентдаги Италия элчихонасида 2025 йил январидан июлигача амал қилган ноқонуний схема фош этилган.
Тергов материалларида ушбу тизим орқали Ўзбекистонда яшамайдиган ёки консулхонага шахсан келмаган Россия фуқароларига талаб қилинган ҳужжатларсиз 1 йилдан 3 йилгача бўлган узоқ муддатли туристик визалар берилгани келтирилган.
Маълум қилинишича, расмий консуллик тўлови 45–60 евро бўлганига қарамай, ариза берувчилардан ҳар бир виза учун 4 минг евродан 16 минг еврогача маблағ олинган.
Схема Москвада рўйхатдан ўтган Happy Travel, Visa4you ва Park Lane туристик агентликлари орқали амалга оширилгани айтилмоқда.
Тергов маълумотларига кўра, камида 95 нафар Россия фуқароси мазкур схема орқали Шенген ҳудудига кирган. 2025 йил декабрь ойида текширувдан сўнг лавозимидан четлатилган собиқ элчи терговчиларга “Менга пул керак эди”, дея изоҳ берган.
Суд унинг Россияга қочиб кетиши мумкинлигини инобатга олиб, қамоққа олиш ҳақида қарор чиқарган. Шунингдек, Россияда туғилган ва Италия фуқаролигига эга ёрдамчиси Татьяна Тараканова ҳам ҳибсга олинган.
Изоҳлар мавжуд емас