Ўзбекистон, Тошкент - Batafsil.uz. Коррупцияга қарши курашиш агентлигида 2026 йилнинг биринчи ярим йиллиги якунларига бағишланган жамоатчилик эшитуви ўтказилди. Унда коррупцияга қарши ички назорат тадбирлари натижасида 1,886 триллион сўмлик молиявий хато ва камчиликлар аниқлангани маълум қилинди.
Таъкидланишича, ҳисобот даврида коррупцияга қарши соҳада бешта муҳим норматив-ҳуқуқий ҳужжат қабул қилинган. Шунингдек, "Рақамли комплаенс" ахборот-дастурий комплекси ишга туширилиб, Коррупциянинг олдини олиш кластери фаолияти йўлга қўйилган.
Маълумотларга кўра, коррупцияга қарши ички назорат бўлинмалари томонидан ўтказилган 19 709 та ўрганиш, мониторинг ва назорат тадбирлари давомида аниқланган камчиликларнинг 264,7 миллиард сўмлик қисми бартараф этилган, 587,8 миллиард сўм маблағнинг мақсадсиз сарфланишининг олди олинган. "Коррупцияга қарши курашиш виртуал академияси" платформаси орқали 28 318 нафар давлат хизматчиси ўқитилган.
Шунингдек, манфаатлар тўқнашуви тўғрисидаги қонунчиликни бузган 127 нафар мансабдор шахсга нисбатан маъмурий баённомалар расмийлаштирилган. Қиймати 298,4 миллиард сўмлик 73 та давлат харидида аниқланган қонунбузилишлар юзасидан вазирлик ва идораларга 42 та тақдимнома киритилган, ҳуқуқни муҳофаза қилувчи органларга эса 43 та материал юборилган.
Ҳисобот даврида 185 та норматив-ҳуқуқий ҳужжат лойиҳаси коррупцияга қарши экспертизадан ўтказилиб, уларда 255 та коррупциявий омил аниқланган. Шунингдек, E-qaror тизимида "яширилган" мақомда қабул қилинган 24 241 та қарор ва фармойиш ўрганилиб, улардан 648 таси асоссиз равишда мазкур мақомда қабул қилингани аниқланган. Бу қарорларни очиқлаш юзасидан маҳаллий давлат ҳокимияти органларига 42 та тақдимнома киритилган.
Йиғилишда Ўзбекистоннинг коррупцияга қарши курашиш бўйича Бешинчи миллий маърузаси Олий Мажлис палаталарига киритилгани, Transparency International билан ҳамкорликда Миллий ҳалоллик тизимини баҳолаш (NIS) ҳисоботи эълон қилингани ҳам қайд этилган. Шунингдек, 2027 йилда БМТнинг Коррупцияга қарши конвенцияси иштирокчи давлатлари конференциясини Ўзбекистонда ўтказиш тўғрисида қарор қабул қилингани таъкидланган.
Муҳокамалар якунида Агентлик ва унинг ҳузуридаги Жамоатчилик кенгашининг 2026 йил иккинчи ярим йиллиги учун устувор вазифалари белгилаб олинган.
Илгари Адлия вазирлиги томонидан давлат органлари ва ташкилотларида коррупцияга қарши курашиш тизимини баҳолаш ҳамда махсус сертификат бериш тартиби тўғрисидаги идоравий ҳужжат давлат рўйхатидан ўтказилганди.
Изоҳлар мавжуд емас