Ўзбекистон, Тошкент - Batafsil.uz. Президент Халқ қабулхонаси ўтказган ўрганишлар натижасида республика миқёсидаги 41 та вазирлик, идора ва ҳокимликларда 1070 та мурожаатнинг ижро муддатлари асоссиз чўзилгани аниқланди. Энг кўп қонунбузилиш ҳолатлари қайд этилган ташкилотлар рўйхатида Андижон вилояти ҳокимлиги биринчи ўринни эгаллади.
Текширув хулосаларига кўра, ижро интизомига риоя қилмаслик бўйича энг юқори кўрсаткичлар қуйидагича шаклланган: Андижон вилояти ҳокимлигида 137 та, Камбағалликни қисқартириш ва бандлик вазирлигида 107 та, Сурхондарё вилояти ҳокимлигида 103 та ҳолат қайд этилган. Шунингдек, Рақобатни ривожлантириш ва истеъмолчилар ҳуқуқларини ҳимоя қилиш қўмитаси (79 та), Ўзбекистон маҳаллалари уюшмаси (65 та), Тошкент шаҳар ҳокимлиги (55 та), Қашқадарё вилояти ҳокимлиги (45 та), Оила ва хотин-қизлар қўмитаси (45 та) ҳамда Наманган вилояти ҳокимлиги (44 та) мурожаатлар билан ишлашда тизимли камчиликларга йўл қўйган.
Мазкур салбий ҳолатларга йўл қўйган масъулларга нисбатан қатъий чоралар кўрилмоқда. Жумладан, ички хизмат текширувлари натижасида 36 нафар ходим интизомий жавобгарликка тортилган, 19 нафари эса эгаллаб турган лавозимидан озод этилган.
Бундан ташқари, мурожаатларни кўриб чиқиш муддатларини бузишда давом этган ва аниқланган камчиликларни бартараф этиш бўйича чора кўрмаган 13 та вазирлик ҳамда идоранинг материаллари ҳуқуқий баҳо бериш учун Бош прокуратурага юборилган. Ушбу чоралар аҳоли мурожаатларига ўз вақтида ва сифатли жавоб беришни таъминлаш ҳамда давлат органларининг ижро интизомини мустаҳкамлашга қаратилгани қайд этилган.
Изоҳлар мавжуд емас