Ўзбекистон, Тошкент - Batafsil.uz. Республикамизнинг Сурхондарё ва Андижон вилоятларида ички ишлар органлари ходимлари томонидан вояга етмаган қизларга нисбатан жинсий зўравонлик содир этилди. Билдирилишича, жиноят содир этилгани билан боғлиқ шов-шувли ҳолатлар юзасидан қатъий ҳуқуқий чоралар кўрилмоқда.
Хусусан, Сурхондарё вилоятининг Денов туманида 14 ёшга тўлмаган қизнинг номусига тегишда гумонланган собиқ инспектор-психологга нисбатан очилган жиноят иши тергови якунланиб, судга оширилган. У Жиноят кодексининг 118-моддаси (14 ёшга тўлмаган шахснинг номусига тегиш), 129-моддаси (16 ёшга тўлмаган шахсга нисбатан уятсиз-бузуқ ҳаракатлар қилиш) ва 206-моддаси (мансаб ваколати доирасидан четга чиқиш) билан айбланмоқда.
Сурхондарё вилояти прокуратураси ҳолат юзасидан расмий муносабат билдирган. Расмий баёнотда таъкидланишича, ижтимоий тармоқларда тарқатилаётган асоссиз маълумотлар ва туҳматдан иборат хабарлар жамоатчиликни чалғитишга хизмат қилади. Прокуратура жиноят содир этган шахснинг жавобгарликдан қутулиб қолишига йўл қўйилмаслигини ва жазо муқаррарлиги тамойили сўзсиз таъминланишини билдирган.
Шунингдек, Андижон вилоятида 16 ёшга тўлмаган қиз билан жинсий алоқада бўлган ички ишлар ходими ҳибсга олинган. Тергов жараёнида вилоят ИИБ Вояга етмаганларга ижтимоий-ҳуқуқий ёрдам кўрсатиш маркази инспектори қизни шаҳардаги кўп қаватли уйга олиб бориб, у билан жинсий алоқа қилгани аниқланган.
Ҳуқуқни муҳофаза қилувчи органлар мазкур ҳолатларни қатъий назоратга олган бўлиб, айбдорлар қонунда белгиланган тартибда жавобгарликка тортилиши таъминланишини билдирмоқда.
Изоҳлар мавжуд емас