Ўзбекистон, Тошкент - Batafsil.uz. Олий Мажлис Қонунчилик палатасининг 25 август куни бўлиб ўтган йиғилишида депутат Зуҳриддин Мавлонов мактабларни замонавий жиҳозлар билан таъминлаш бўйича белгиланган вазифалар ижроси кечикаётганини танқид қилди.
Депутат 2026 йил якунига қадар мамлакатда 1000 та янги компьютер синфи ташкил этиш ва 6300 та электрон доска харид қилиш режалаштирилганини эслатган. Ушбу вазифалар 2030 йилгача мўлжалланган стратегияда белгиланган бўлиб, уни амалга оширишга Мактабгача ва мактаб таълими вазирлиги ҳамда Иқтисодиёт ва молия вазирлиги масъул ҳисобланади.
Бу мақсадлар учун давлат бюджети ҳисобидан ҳам маблағ ажратилиши кўзда тутилган. Хусусан, компьютер синфлари учун 250 миллиард сўм, электрон доскалар хариди учун эса 100 миллиард сўм, жами 350 миллиард сўм йўналтирилиши белгиланган.
Бироқ депутатнинг таъкидлашича, йилнинг ўтган даврида ҳалигача бирорта ҳам янги компьютер синфи ташкил этилмаган ва бир дона ҳам электрон доска харид қилинмаган. Ҳисоботларда фақат тендерлар эълон қилингани ҳақида маълумот бор.
"Маблағ аниқ, масъул аниқ, муддат бор. Лекин ҳозирга қадар бирортаси амалга оширилмаган. Кечикиш сабаблари нимада? Йил якунига тўрт ой қолди. Шу вақт ичида 1000 та компьютер синфи ва 6000 дан зиёд электрон доскалар мактабларга етказиб бериладими?" — дея савол қўйган депутат.
Бунга жавобан Мактабгача ва мактаб таълими вазири Эъзоза Каримова компьютер синфларини харид қилиш бўйича ишлар бошланганини маълум қилган. Унинг айтишича, дастлабки экспертиза хулосалари асосида ажратилган маблағлар ҳисобига 1000 та эмас, 1350 та компьютер синфи тўплами харид қилиниши белгиланган.
Вазирнинг маълум қилишича, ушбу харид бўйича дастлабки экспертиза хулосалари олинган ва тендер савдолари эълон қилинган. Ғолиб аниқлангач, давлат хариди амалга оширилади.
Электрон доскалар масаласида ҳам тендер жараёнида кечикиш кузатилган. Хусусан, 12 июль куни электрон доскаларни харид қилиш бўйича тендер эълон қилинган, бироқ ғолиб аниқланмагани сабабли 10 август куни тендер қайта эълон қилинган.
Эъзоза Каримова харид жараёнлари якунлангач, белгиланган жиҳозлар мактабларга етказиб берилишини айтган.
Вазирнинг таъкидлашича, октябрь ойи якунига қадар 1350 та компьютер синфи тўплами ва белгиланган электрон доскалар мактабларга тўлиқ етказиб берилади. У шу орқали давлат дастурида белгиланган кўрсаткичлар бажарилишини маълум қилган.
Бундан олдин жамоатчилик фаоли Расул Кушербаев давлат мактаб-интернатларидан бирида пулли синфлар ташкил этилаётгани ва бунинг учун ҳуқуқий асос сифатида жамоатчиликка очиқ бўлмаган қарор кўрсатилаётганини танқид қилганди.
Изоҳлар мавжуд емас