Ўзбекистон, Тошкент - Batafsil.uz. Вазирлар Маҳкамасининг қарорига киритилган янги ўзгартиришларга кўра, биринчи ва ундан кейинги фарзандлари перинатал ёки эрта неонатал даврда вафот этган оилаларнинг навбатдаги тирик туғилган боласи учун бир марталик нафақа пули берилади.
Илгари амалда бўлган тартибга кўра, бола туғилганда бериладиган бир марталик "суюнчи пули" фақат биринчи фарзанд учун ажратилар эди. Биринчи фарзанди нобуд бўлган ота-оналарнинг навбатдаги соғлом туғилган боласи расмиятчиликда иккинчи фарзанд ҳисоблангани сабабли, уларга "суюнчи пули" бериш рад этиб келинган. Президент Халқ қабулхонасига келиб тушган кўплаб мурожаатлар ва ўтказилган таҳлиллардан сўнг ушбу адолатсизлик бартараф этилган.
Нодавлат ва давлат даражасидаги янги тартиб фуқароларнинг ижтимоий ҳимоясини кучайтиришга хизмат қилади.
Ҳозирги кунда Ўзбекистонда бола туғилганда бериладиган бир марталик нафақа миқдори меҳнатга ҳақ тўлашнинг энг кам миқдорининг 70,3 фоизини, яъни тақрибан 890 минг сўмни ташкил этади. Амалдаги тартибга кўра, биринчи фарзанд учун барча аёлларга, иккинчи фарзанд учун эса фақат "Ижтимоий ҳимоя ягона реестри"га киритилган эҳтиёжманд оилаларга нафақа тўланади. Учинчи ва ундан кейинги фарзандлар учун эса ушбу тўлов кўзда тутилмаган.
Давлат бюджетидан "суюнчи пули" тўловлари учун ажратилаётган маблағлар ҳажми йиллар кесимида камайиб бормоқда. Хусусан, ушбу мақсадлар учун 2024 йилда 382,4 миллиард сўм, 2025 йилда 275 миллиард сўм йўналтирилган бўлса, жорий 2026 йилда бу миқдор 229,8 миллиард сўм этиб белгиланган.
Изоҳлар мавжуд емас