Ўзбекистон, Тошкент - Batafsil.uz. Ўзбекистонда тадбиркорлик фаолиятини янада соддалаштириш ва бюрократик тўсиқларни камайтириш мақсадида муҳим ўзгаришлар режалаштирилмоқда, хусусан, Президент Шавкат Мирзиёев ишбилармонлик муҳитини яхшилашга қаратилган таклифларни маъқуллади.
Мазкур ташаббусга кўра, эндиликда корхона номи ва фаолият турини билдирувчи ахборот белгилари реклама сифатида баҳоланмайди. Амалдаги тартибда бундай пешлавҳалар реклама деб топилиб, улар учун алоҳида рухсатнома олиш ва тўловлар ундириш талаб қилинар эди, бу эса тадбиркорлар учун ортиқча вақт ва молиявий харажатларга сабаб бўлаётган эди.
Эслатиб ўтамиз, 29 апрель куни Ўзбекистон Савдо-саноат палатасида бизнес ва давлат идоралари вакиллари ўртасида ишчи учрашувда ҳам бу масала кўтарилган. Тадбиркорларнинг фикрича, бу ҳозирги босқичда хусусий секторга юк туғдиради ва ҳуқуқий тузатишларни талаб қилади. "Dym&Dream" ресторани вакили жойлардаги ходимлар электр энергиясини узиб қўйиш билан қўрқитиб, пешлавҳаларни мажбуран олиб ташлашни талаб қилаётган ҳолатлар ҳақида хабар берган эди.
Эндиликда эса ушбу белгилар учун махсус паспорт талаби ҳам бекор қилиниши кўзда тутилган. Мазкур янгиликлардан ташқари, бизнес юритишни осонлаштириш бўйича реклама ва ахборот белгиларини жойлаштириш бўйича дизайн талабларини босқичма-босқич жорий этиш ҳамда юридик шахсларнинг ўз транспорт воситаларида бренд белгиларини жойлаштириш тартибини соддалаштириш ташаббуслари ҳам илгари сурилмоқда.
Давлат раҳбари ушбу чора-тадбирлар савдо ва хизмат кўрсатиш объектларининг ташқи кўринишини яхшилаш билан бирга, мижозлар оқимига ҳам ижобий таъсир кўрсатишини таъкидлаб, назорат ва тартибга солиш механизмларини соддалаштириш ҳамда рақамлаштириш жараёнларини бизнес учун чинакам қулайлик воситасига айлантириш вазифасини қўйган.
Изоҳлар мавжуд емас